“İnnovasiyalar Mərkəzi”nin tərəfdaşlığı ilə “AWITA 2024” Azərbaycanda İT sahəsində ən uğurlu qadınları elan edib.
Xeberler.az bildirir ki, 6 dekabr 2024-cü il tarixində “Fairmont Baku” otelində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin tərəfdaşlığı və "Femmes Digitales" – "Texnologiyalar sahəsində qadınlara dəstək" İctimai Birliyinin təşkilatçılığı ilə AWITA – Azərbaycan Qadınları TECH-də Mükafatlarının təqdimat mərasimi keçirilib.
Tədbirin məqsədi ölkənin rəqəmsal iqtisadiyyatında gender bərabərliyini təşviq etmək, informasiya texnologiyaları sahəsində əldə olunan nailiyyətlərdə qadınların rolunu tanıtmaq, təcrübə mübadiləsi və İT mütəxəssislərini bir araya gətirmək üçün platforma yaratmaq olub.
“AWITA 2024” mərasimi COP29 qlobal gündəliyi çərçivəsində texnologiyaların və gender bərabərliyinin davamlı inkişafa yönəlmiş töhfəsini vurğulayıb. Parlament üzvləri, səfirlər, dövlət qurumlarının nümayəndələri, texnologiya şirkətlərinin liderləri, universitet rektorları, tələbələr və gənc mütəxəssislər də daxil olmaqla 500-dən çox dəvət edilmiş qonaq qadınların texnologiya sahəsindəki nailiyyətlərini və onların Azərbaycan iqtisadiyyatı və cəmiyyətinin inkişafına verdikləri töhfələri qeyd etmək üçün bir araya gəlib.
Dördüncü AWITA tədbiri, həmçinin Femmes Digitales-in 10 illik yubileyi Azərbaycanda texnologiyaların və inklüzivliyin inkişafında qadın liderliyinin əhəmiyyətini vurğulayıb, bu sahədə yeni bir səhifə açıb.
Qala tədbirində dünya üzrə aparıcı yenilikçiləri və gender bərabərliyi tərəfdaşlarını birləşdirən "Femmes Digitales" Fəxri Müşavir Şurasının üzvləri və "AWITA 2024" müsabiqəsinin münsiflər heyəti təqdim edilib. Onların arasında Böyük Britaniyadan eWorldwide Group-un sədri Pr. Səlma Abbası, Milli Məclisin deputatı, ADA Universitetinin prorektoru Dr. Fariz İsmayılzadə, VXSİDA, “İnnovasiyalar Mərkəzi”nin direktoru Vüsal Rüstəmov, Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərov, qlobal konsaltinq şirkəti olan EndeavorVR-nin həmtəsisçisi və baş direktoru, ABŞ-dan "Gələcəyin TOP 100 Qadını" siyahısına daxil olan Emi Pek, Perspektywy Women in Tech təşkilatının prezidenti və Polşanın Rəqəmsallaşma Nazirliyi yanında rəqəmsallaşma üzrə Şuranın üzvü Banka Svinska və digər görkəmli şəxslər yer almışdır.
Tədbirdə AWITA 2024 müsabiqəsində iştirak üçün respublikanın müxtəlif bölgələrindən müraciət etmiş 200-dən çox namizəd arasından 33 nəfərlik münsiflər heyəti tərəfindən12 nəfər seçilərək mükafatlandırılıb.
"İnnovasiyalar Mərkəzi" yalnız innovativ düşüncə və biliklərin inkişafı ilə deyil, həm də gender bərabərliyinin təşviqi ilə fərqlənir. Mərkəz qadınların innovativ layihələrdə iştirakını artırmaq məqsədilə müxtəlif təlim proqramları, startap müsabiqələri və sosial innovasiya yönümlü tədbirlər təşkil edir və ya bu cür tədbirlərin keçirilməsinə dəstək göstərir. Bu fəaliyyətlər qadınların ideyalarının reallaşdırılması, yüksək texnologiyalar sahəsində bilik və bacarıqlarının artırılması üçün geniş imkanlar yaradır.
