TEXNOLOGİYA

“Nvidia” şirkəti çərşənbə günü növbəti maliyyə rübü haqqında hesabat verəcək, lakin bir çox fond bazarı iştirakçıları onu süni intellekt sistemləri üçün komponentlər bazarında əsas benefisiarlardan biri hesab edərək hesabatlarının təhlilinə daha geniş məna verirlər. Şirkət bildirir ki, istənilən xoşagəlməz sürpriz qlobal birjaların çökməsinə səbəb ola bilər.

Xeberler.az “Financial Times”a istinadən məlumat verir ki, bu ilin əvvəlindən “Nvidia”nın səhmləri 30 faizdən çox bahalaşıb, şirkətin kapitallaşması isə 4 trilyon dolları ötüb. Əsasən bu emitentin yüksək xüsusi çəkisi sayəsində S&P 500 indeksi bu il 9% möhkəmlənib. “Nvidia” səhmlərinin dinamikası artıq yaxın illərdə süni intellekt sahəsinə investisiyanın perspektivlərini müəyyən edən bir növ fond bazarının göstəricisinə çevrilir.

“Financial Times” nəşrinin məlumatına görə, analitiklər orta hesabla “Nvidia”nın keçən rübdə 46 milyard dollar gəlir əldə edəcəyini gözləyirlər ki, bu da illik müqayisədə 53% artım deməkdir. Bununla belə, bu dinamika bəzilərini məyus edə bilər, çünki şirkətin gəliri əvvəlki rübdə 69%, 2024-cü ilin əvvəlində isə bu rəqəm 250%-dən çox artıb. “Morgan Stanley” mütəxəssisləri əmindirlər ki, bazar artıq “Nvidia”nın gəlir artım tempi ilə maraqlanmır - investorlar şirkətin digər bazar oyunçuları ilə müqayisədə daha yaxşı nəticələr göstərmək qabiliyyətini daha çox qiymətləndirəcəklər.

“Nvidia” şirkətinin Çinə H20 sürətləndiricisi tədarükləri ilə bağlı vəziyyət investorların əhvali-ruhiyyəsinə ziddiyyətli təsir göstərir. Bir tərəfdən şirkət ən yaxşı vaxtlarında belə Çindəki ümumi gəlirinin 15%-dən çoxunu ala bilməyib. Digər tərəfdən, mövzu o qədər siyasiləşib ki, şirkətin səhmlərinin qiymətinin dəyişməsi kifayət qədər əhəmiyyətli dərəcədə ondan asılıdır. “Nvidia rəhbərliyi” ABŞ tərəfindən aprel qadağasının iyul ayında qaldırılmasından sonra H20 sürətləndiricilərinin tədarükünün bərpası probleminin sürətli həllinə arxalanmayaraq, Çində gəlir gözləntilərini müvəqqəti olaraq ümumi proqnoza daxil etməmək qərarına gəlib.

Bununla belə, “Wedbush “analitikləri “Nvidia”nın süni intellekt seqmenti sayəsində gəlirlərini artırmağa davam etmək qabiliyyətinə yanaşmada çox optimistdirlər. Onların Asiya mənbələrindən əldə etdikləri məlumatlara görə, şirkətin sürətləndiricilərinə olan tələbat hazırda tədarükdən on dəfə çoxdur və belə şəraitdə onun tez bir müddətdə təmin olunmasından danışmaq mümkün deyil.