TƏHLİL VƏ RƏYLƏR

Dövlət qurumlarının mobil tətbiqlərinin bağlanaraq bütün xidmətlərin vahid platforma üzərindən təqdim olunması planı müəyyən risklər yaradır.

Xeberler.az bildirir ki, bu fikirləri Azərbaycan İnternet Forumunun prezidenti, ekspert Osman Gündüz sosial media hesabında paylaşıb.

O bildirib ki, Əmək və Əhalinin Sosial Müdafiəsi Nazirliyinin e-sosial mobil tətbiqinin dayandırılması və xidmətlərin myGov platformasına inteqrasiyası bu istiqamətdə atılan addımlardan biridir. Ekspertin sözlərinə görə, gələcəkdə digər dövlət xidmətlərinin də tam şəkildə bu platformaya köçürülməsi gözlənilir.

Osman Gündüz qeyd edib ki, rəqəmsal xidmətlərin vahid platformada təqdim olunması strateji baxımdan doğru addım olsa da, bu prosesin riskləri kifayət qədər nəzərə alınmalıdır. Onun sözlərinə görə, hazırda bir çox dövlət resursunun Digital Login üzərindən işləməsi və son vaxtlar baş verən texniki problemlər göstərir ki, bir nöqtədə yaranan nasazlıq bütün xidmətlərin dayanmasına səbəb ola bilər.

Ekspert vurğulayıb ki, e-Sosial, Mobil Notariat, e-Vergi, Smart Customs, e-Təbib, e-Polis kimi sistemlərin də myGov platformasında birləşdirilməsi bu riskləri daha da artırır. Belə hallarda xidmətlərin dayanması vətəndaşlar və biznes üçün hüquqi və maliyyə problemləri yarada bilər.

O əlavə edib ki, myGov platforması üzrə miqrasiya prosesinə başlamazdan əvvəl sistemin dayanıqlılığı təmin edilməli, müvafiq auditlər aparılmalı və təhlükəsizliklə bağlı normativ baza gücləndirilməlidir. Ekspert bu platformanın artıq kritik infrastruktur kimi qiymətləndirilməli olduğunu bildirib.

Bununla yanaşı, Osman Gündüz qeyd edib ki, platformanın inkişafında xarici şirkətlərlə əməkdaşlıq məsələsi də əlavə risklər yaradır və bu, rəqəmsal suverenlik baxımından diqqətlə qiymətləndirilməlidir.

Ekspert sonda aidiyyəti qurumları miqrasiya prosesi və təhlükəsizlik tədbirləri ilə bağlı ictimaiyyətə daha geniş məlumat verməyə çağırıb.