Bu gün İnnovasiya və Rəqəmsal İnkişaf Agentliyi tərəfindən
mygov rəqəmsal platformasının yeni versiyası təqdim edildi. Əsas yeniliklərdən biri odur ki, mygov platforması vətəndaşlar üçün daha faydalı və daha çox yaxın olub.
Xeberler.az qeyd edir ki, tədbirdə iştirak edənlərdən biri də Azərbaycan İnternet Formunun Prezidenti, ekspert Osman Gündüz olub. Ekspert mygovun yenilikləri ilə bağlı öz fikirlərini bildirib.
Osman Gündüzün sözlərinə görə, yenilənmiş versiyada ailə qurmaq, valideyn olmaq və yaxın qohumun vəfatı kimi vacib həyat hadisələri ilə bağlı sənədləşmə prosesi sadələşdirilib. Mygov bu prosesləri tam olaraq rəqəmsallaşdırmağa imkan verib.
Məsələn, yeni doğulan uşaqların qeydiyyatını birbaşa mygov üzərindən onlayn olaraq reallaşdrımaq olar.
Ekspert bildirib ki, bundan sonra sizdən hardasa, hansısa dövlət qurumunda, bankda, təhsil müəssisəsində şəxsiyyət vəsiqəsi tələb olunan zaman mygov-a daxil olub məlumatlarım bölməsindən bu məlumatları göstərmək yetərlidir. Bu məlumat artıq sənəd hesab olunur. Yaxud hansı qurumdasa sizdən, nikah və doğum şəhadətnamələri, sizə yaxın olan qohumunuzun ölüm şəhadətnaməsi istənilərsə onları fiziki olaraq təqdim etməyə ehtiyac yoxdur:
"mygov-a daxil olub bu məlumatları təqdim edə bilərsiniz, qarşı tərəf artıq bunları adi məlumat deyil, sənəd olaraq qəbul etməyə borcludur. Yəni indiyədək vətəndaşla bağlı məlumat olaraq mygov-da yerləşdirilən informasiyalar rəqəmsal sənəd statusu qazanıb. Vətəndaşlar bu rəqəmsal sənəd və məlumatları QR kod və ya PDF şəklində paylaşa da bilirlər".
Osman Gündüz qeyd edib ki, mygov kimlərsə tərəfindən vətəndaşlar haqqında məlumatların toplanmasına icazə verilməsini də təmin edib:
"Artıq siz mygov vasitəsilə hansısa quruma sizin haqqınızda, sizdən xəbərsiz məlumat toplanmasına icazə verməyə də bilərsiniz".
Ekspert qeyd edib ki, Rəqəmsal hökumət quruculuğunda bəzi problemlər hələ də var. Hələlik çox sayda xidmətlər var ki, mygov platformasına inteqrasiya olunmayıb. Hansı ki Prezidentin fərmanına görə bu xidmətlərin hamısının bir nöqtədən, mygov üzərindən veirlməsi təmin edilməlidir. Ayrı-ayrı resurslarda olan faydalı xidmətlərin mygov-a inteqrasiyası indiki anda çox vacibdir.
Osman Gündüzün sözlərinə görə, dövlətə məxsus datadan effektiv istifadədə də problemlər qalır. Açıq məlumatlar portalında “kasıbçılıqdır”:
"mygov rəqəmsal platformasında olan 40-dan çox məlumatın az bir hissəsi rəqəmsal sənəd statusuna malikdir".
Sonda ekspert qeyd edib ki, Nazir müavini Samir Məmmədov, İRİA rəsmiləri bu sənədlərin sayının tezliklə artırılacağını, rəqəmsal hökumət quruculuğu sahəsində işlərin daha da sürətləndiriləcəyini bildiriblər.
