Azərbaycan İnternet Forumunun Prezidenti, ekspert Osman Gündüz dövlət xidmətlərinin vahid mərkəzdən – mygov platforması üzərindən təqdim olunması ilə bağlı məsələyə münasibət bildirib.
Xeberler.az məlumat verir ki, ekspert bu barədə sosial media hesabında paylaşım edib.
O qeyd edib ki, Prezident İlham Əliyevin dövlət xidmətlərinin vahid platforma üzərindən təqdim olunması ilə bağlı mövqeyi vətəndaş baxımından ideal modeldir. Onun sözlərinə görə, vətəndaş üçün ən düzgün yanaşma bütün dövlət xidmətlərinin bir platformadan əlçatan olması, əlavə tətbiq və sistem axtarışına ehtiyac qalmamasıdır.
Osman Gündüz bildirib ki, Prezidentin göstərişi dövlət qurumlarının yalnız xidmət istehsalçısı kimi fəaliyyət göstərməsini, paralel platforma və tətbiqlərin isə ləğv edilməsini nəzərdə tutur. Bu modelə əsasən, mygov vahid vitrin rolunu oynamalı, xidmətlərin özü isə müvafiq qurumlarda formalaşdırılmalı və inkişaf etdirilməlidir. Ekspert vurğulayıb ki, bu yanaşma beynəlxalq təcrübəyə uyğundur və rəqəmsal dövlət modelində əsas prinsiplərdən biri hesab olunur.
O xatırladıb ki, vahid giriş və mərkəzləşdirilmiş vitrin modelinin vacibliyi ilə bağlı təkliflər uzun illərdir səsləndirilsə də, indiyədək bu mövzuda bu qədər açıq və prinsipial mövqe ortaya qoyulmamışdı.
Bununla yanaşı, ekspert Prezidentin çıxışında tətbiqləri hazırlayan komandaların əməyinin yüksək qiymətləndirilməsini mühüm məqam kimi dəyərləndirib. O qeyd edib ki, bu platformalar inteqrasiyaların məhdud olduğu dövrdə minlərlə, hətta milyonlarla vətəndaşa dayanıqlı xidmət göstərib və dövlətin rəqəmsallaşma yolunda mühüm mərhələ rolunu oynayıb.
Osman Gündüz diqqətə çatdırıb ki, myGov yalnız vitrindir və xidmətlərin özü ayrı-ayrı dövlət qurumlarında istehsal olunur. İndiyədək xidmətlərin həm mygov, həm də qurumların öz resursları üzərindən təqdim olunmasının komandalar üçün əlavə motivasiya yaratdığını qeyd edən ekspert sual edib ki, paralel platformalar ləğv edilərsə, xidmətləri yaradan və inkişaf etdirən əməkdaşların motivasiyası zəifləyə bilərmi.
Onun fikrincə, bu prosesdə innovasiyaya meylin azalması və təşəbbüskarlığın texniki icra səviyyəsinə enməsi kimi risklər mövcuddur və aidiyyəti qurumlar bunu nəzərə almalıdır.
Ekspert hesab edir ki, keçid prosesi kəskin deyil, mərhələli şəkildə həyata keçirilməlidir. İstifadəçi axını tədricən mygov platformasına yönləndirilməli, paralel işləmə dövrü saxlanmalı, komandaların yeni mərhələdə rolu və məsuliyyəti əvvəlcədən aydın müəyyənləşdirilməlidir.
Osman Gündüz vurğulayıb ki, rəqəmsal hökumətin dayanıqlılığı yalnız vahid platforma ilə deyil, insan kapitalını qoruyan və inkişaf etdirən düzgün idarəetmə modeli ilə təmin olunur.
