TƏHLÜKƏSİZLİK

m10 elektron pulqabısı ətrafında baş verən hadisələr getdikcə daha ciddi miqyas alır. Artıq söhbətin milyonlarla, bəzi mənbələrə görə isə milyardlarla manatlıq dövriyyədən getdiyi bildirilir.

Xeberler.az bildirir ki, bununla bağlı Azərbaycan İnternet Formunun Prezidenti, ekspert Osman Gündüz məlumat verib.

O bildirib ki, son günlər Mərkəzi Bankda fintex sektorunun rəhbərləri ilə görüş keçirilib. Güman olunur ki, m10 ilə bağlı baş verənlər həmin görüşdə də müzakirə olunub. Bununla bağlı Mərkəzi Bank hələlik rəsmi açıqlama verməyib.

Ekspert qeyd edib ki, elektron pul və fintex sektorunda problemlər hələ də qalmaqdadır və baş verən hadisə artıq sırf texniki və ya sektor daxili məsələ deyil. Onun sözlərinə görə, ortada böyük miqyaslı kiber insident var və bu, milli təhlükəsizlik kontekstində qiymətləndirilməlidir.

Osman Gündüzün sözlərinə görə, m10 və PashaPay-in kritik informasiya infrastrukturu siyahısına daxil olub-olmaması ictimaiyyətə məlum deyil, çünki həmin siyahı qapalıdır. Lakin istənilən halda hadisənin miqyası ciddi araşdırma tələb edir.

Ekspert vurğulayıb ki, belə hallar Dövlət Təhlükəsizliyi Xidmətinin Milli Kibertəhlükəsizlik Mərkəzi və Daxili İşlər Nazirliyinin Kibercinayətkarlığa qarşı Mübarizə Baş İdarəsinin səlahiyyət sahəsinə daxil olan məsələdir.

O açıqlamasında bank sektorunda kiber fırıldaq riskləri ilə bağlı əvvəllər də xəbərdarlıqlar edildiyi xatırladılıb. Bildirilib ki, bankların data və İT mərkəzlərində, xüsusilə rəhbər vəzifələrdə xarici vətəndaşların olması əlavə risklər yarada bilər.

Osman Gündüz diqqətə çatdırılıb ki, yeni qanunvericiliyə əsasən kritik infrastrukturu audit edən şəxsin Azərbaycan vətəndaşı olması tələb edilir. Lakin həmin kritik sistemlərə rəhbərlik edən şəxsin vətəndaşlığı ilə bağlı konkret tələbin olmaması suallar doğurur.

Ekspert ümid etdiyini bildirib ki, məsələ bütün aidiyyəti qurumların diqqətindədir və baş verənlər obyektiv şəkildə araşdırılacaq.