TƏDBİRLƏR

Azərbaycan Mərkəzi Bankı ölkədə poçt banklarının yaradılması üzrə hazırlıq işlərini davam etdirir. Mərkəzi Bankın idarə heyətinin sədri Elmar Rüstəmovun Fineko/abc.az-a verdiyi məlumata görə, Azərbaycanın poçt şöbələri bank xidmətlərinin göstərilməsinə dair lisenziyanı 2009-cu ilin sonuna kimi alacaqlar. “Lisenziyaların verilməsi olduqca vacib məsələdir. Həmin məsələ nəticəsində ölkədə təxminən 1,5 min poçt bankından ibarət şəbəkə yaradılacaq.

İlkin mərhələdə bu poçt bankları tərəfindən kommunal xidmətlərin yığımı, ödəniş funksiyaları, pul baratları kimi xidmətlərin göstəriləcəyi, eləcədə iri (AZIPS) və kiçik (XOHKS) ödəniş sistemlərinin, milli kart ödənişi sisteminin üzvü olacaqları nəzərdə tutulur”, - deyə E. Rüstəmov bildirib.

Qeyd olunan şəbəkənin ölkə boyu bankaların, onların filial və bölmələrinin ümumi sayından üç dəfə daha geniş olacaq. AMB-nin idarə heyətinin sədri onu da qeyd edib ki, “bu işlərin aparılması üçün Azərbaycan Mərkəzi Bankının və Rabitə və İnformasiya Texnologiyaları Nazirliyinin işçi qrupu fəaliyyət göstərir ki, həmin qrup bütün yaranan məsələlərin həllini təmin edir”. Mövcud qanunvericiliyə əsasən poçt şöbələri kredit xidmətləri istisna olmaqla bütün spektr bank xidmətlərini təqdim edə bilər. Sistem Dünya Bankının “Maliyyə xidmətlərinin inkişafı layihəsi” çərçivəsində təklif olunur və reallaşdırılır.