MÜSAHİBƏ

Bu gün RİNN yanında İctimai Şuranın sədri Siruz Abasbəyli və Aztelekom rəhbərliyi ilə görüşümüz oldu. Görüşdə bir müddət öncə qurumun təklif etdiyi yeni internet tarifləri, internet xidmətinin keyfiyyəti, aparılan infrastruktur dəyişiklikləri və modernizasiya işləri, ölkə üzrə yeni GPON infrastrukturun qurulması ətrafında müzakirələr aparılıb.

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.

"Aztelekomda son zamanlarda infrastrukturun yenilənməsi və genişləndirilməsi, yeni keyfiyyət dəyişikliklərinin yaranması, yüksəksürətli internet xidmətlərinin təqdim edilməsi, dövlət-özəl tərəfdaşlığının inkişafı müsbət addım olaraq dəyərləndirilib. Görüşdə daha çox müzakirə predmeti olan məsələ bu dövlət provayderi tərəfindən aşağı internet sürətlərinin ləğvi və bəlli bir istifadəçi təbəqəsi üçün GPON üzərindən verilən internet sürətlərində tələbata uyğun seçim imkanlarının məhdudlaşdırılması ilə bağlı olub.

Eyni zamanda görüşdə Aztelekom və Baktelecom qurumlarının vahid bir idarəetmədə birləşdirilməsi, ölkə üzrə vahid bir telekommunikasiya operatorun yaradılması ətrafında fikir mübadiləsi aparılıb.

Müzakirə olunan mövzular üzrə rəylərimizi təqdim etdik və bu cür görüşlərin, müzakirələrin davam etdirilməsinin faydalı olduğunu bildirdik".