5G üçün zəruri olan tezliklər hazırda kimə məxsusdur və Nazirlik bu tezlikləri geri ala biləcəkmi ?
Xeberler.az bildirir ki, bu barədə Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.
"Bu gün RİNN radiotezliklərdən istifadə üzrə yeni Metodika ilə bağlı yaranmış yeni mühitə aydınlıq gətirmək üçün maraqlı tərəflərlə birgə müzakirə təşkil edib.
Tədbirdə nazirlik yanında İctimai Şuranın üzvləri, radiotezlik istifadəçisi olan şirkət rəsmiləri, müxtəlif qurumların nümayəndələri və mütəxəssislər iştirak ediblər.
Radiotezliklərdən şəffaf, ədalətli və səmərəli istifadəsinin təmin edilməsi istiqamətində faydalı müzakirələr keçirilib.
Hiss olunurdu ki, radiotezlik istifafəçilərini narahat edən xeyli problemlər var.
Müzakirələrin gedişində yeni Metodikanın mahiyyəti, faydalı radiotezliklərin çatışmazlığı, yeni texnologiyalar üçün gərəkli olan tezliklərin digər istifadəçilər tərəfindən illər öncə əldə edilməsi və səmərəsiz istifadəsi, tezlik sektorunda rəqabətli və şəffaf mühitin formalaşması, yeni tənzimləyici qurumun- İKT Agentliyin formalaşmasının sürətləndirilməsi, 5G üçün müraciətlərə baxılması qaydası, radiomüdaxilə ilə bağlı monitorinqlərin aparılması, sərhəd bölgələrdə olan radiomanelər, radiohəvəskarlara dəstəyin gücləndirilməsi və s. ətrafında fikir mübadiləsi aparılıb.
Rəqəmsal inkişaf və nəqliyyat nazirinin müavini Rövşən Rüstəmov və Dövlət Radiotezliklər İdarəsinin rəsmiləri radiotezlik istifadəçilərini son dövrlər bu sahədə görülən işlər və yeniliklər, qaldırılan məsələlərlə bağlı məlumatlandırıblar".
