Bu gün Vətəndaşlara Xidmət və Sosial İnnovasiyalar üzrə Dövlət Agentliyi yanında İctimai Şuranın, AzTU-nun Rəqəmsal Transformsiya Şurasının və İKT sektorun tanınmış nümayəndələrinin Bilim Bakı Mərkəzi, 2-ci İNNOLAND və Dövlət Agentliyinin İnnovasiya Mərkəzi ilə tanışlığı təşkil olunub.
Xeberler.az bildirir ki, bu barədə Azərbaycan İnternet Forumunun Prezidenti Osman Gündüz öz "Facebook" səhifəsində paylaşım edib.
"Tədbir Vətəndaşlara Xidmət və Sosial İnnovasiyalar üzrə Dövlət Agentliyinin rəhbərliyi və İctimai Şuranın birgə təşəbbüsü ilə baş tutub .
Dövlət Agentliyinin sədr müvani Ceyhun Salmanov və Bilim Bakı Mərkəzinin məsul şəxsi yeni yaranan innovativ qurumlar haqqında, görülən işlər və növbəti addımlar haqqında ətraflı məlumat veriblər.
Tanışlıqdan sonra Dövlət Agentliyinin sədr müavini Ceyhun Salmanovun, Elektron Hökumətin İnkişafı Mərkəzinin direktoru Fariz Cəfərovun, millət vəkili və İctimai şuranın üzvü Vüqar Bayramovun, AzTU rektoru Vilayət Vəliyevin və digər qonaqların iştirakı ilə ölkədə innovasiyaların və ekosistemin inkişafı, rəqəmsal hökumət quruculuğu və rəqəmsal transformasiya , ekosistemin inkişafında universitetlərin rolu ətrafında ictimai müzakirə təşkil olunub və mövzu ətrafında fikir mübadiləsi aparılıb.
Müzakirələrin gedişində sektorda problemlərin aradan qaldırılması, innovativ inkişafın sürətləndirilməsi, koordinasiya və inteqrasiya işlərinin gücləndirilməsi və qanunverici bazanın təkmilləşdirilməsi üçün təklif və rəylər irəli sürülüb."
