AZNET

Rəqəmsal İnkişaf və Nəqliyyat Nazirliyi yanında İctimai Şuranın Nazirliyin İnnovasiya və Rəqəmsal İnkişaf Agentliyinin rəhbərliyi ilə görüşü keçirilib.

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.

“Görüşdə Agentliyin rəhbəri İnarə Vəliyeva və Agentlik sədrinin müşaviri Şahin Əliyev hazırda yenidən formalaşmaqda olan Agentlikdə görülən işlərlə və gözləntilərlə bağlı İctimai Şura üzvlərini məlumatlandırıblar. Elektron hökumət səlahiyyətlərini də əldə edən qurumun innovasiya və rəqəmsallaşma istiqamətində əsas fəaliyyəti üzrə yol xəritəsinin hazırlandığı, ASAN-la təhvil-təslim işlərinin əsasən yekunlaşdığı və artıq işlərə başladığı diqqətə çatdırılıb.

İctimai Şura üzvləri rəqəmsal transformasiya, innovasiyaların inkişafı və rəqəmsal hökumət quruculuğu ilə bağlı, İRİA-nın əlaqələndirici və tənzimləyici rolunun gücləndirilməsi ilə bağlı, e-xidmətlərin hüquqi təminatı və keyfiyyətinin artırılması , İT kadrların hazırlanması ilə bağlı bir çox məsələlərə münasibət bildiriblər, suallar veriblər və təkliflərini çatdırıblar. Sektordakı mövcud vəziyyətlə bağlı fikir mübadiləsi aparılıb.

İRİA rəhbərliyi artıq formalaşması başa çatan qurumun tez-tez belə görüşlər keçirəcəyini, sektorda görülən işlər və gözləntilərlə bağlı müzakirələrin daha tez-tez aparılacağını bildirib”.