TV VƏ RADİO

  Vüqar Bəyturan: “MTRŞ-nin qərarının peyk antennası biznesi ilə məşğul olanlardan başqa heç kimə faydası yoxdur”
  
  QayNar: Son dövrlər Milli Teleradio Şurası qəbul etdiyi qərarlarla ölkə ictimaiyyətini təəcübləndirir. Xarici radiostansiyaların FM tezliyindən məhrum edilməsinin ardınca xarici dillərdə verilən verlişlərə, o cümlədən filmlərə yasaq qoyulması və bu yasağın türk dilinə də aid olunması ictimaiyyətdə ciddi narazılq doğurub. Bu sözlər MQP sədri Vüqar Bəyturanın adından yayılan bəyanatdan götürülüb.
Qaynar.info-ya daxil olan bəyanatda daha sonra deyilir:

  \"Sözügedən yasağın rus və digər xarici dillərə aid edilməsi normal qarşılana bilər, bu bəlkə də bir az da gecikmiş addımdır. Amma türk dünyasının inteqrasiyası istiqamətində Azərbaycan hakimiyyəti addımlar atdığı bir vaxtda türk dilinə düşmən münasibət göstərilməsi heç bir məntiqə sığmır.\"

  Qeyd olunan məsələyə münasibət bildirən MQP başqanı, 6 partiyanı birləşdirən Millətçi Birliyin sədri Vüqar Bəyturan MTRŞ-nın türk dilinə yasaq qoymasını milli maraqlara zərbə kimi qiymətləndirib və bu qərarın peyk antennası biznesi ilə məşğul olanlardan başqa heç kimə faydası olmadığını söyləyib.

  MQP başqanı türk dilinin Azərbaycan türkcəsi ilə ciddi şəkildə fərqlənmədiyini, türkdilli filmlərin geniş seyrçi kütləsini qazandığını, türkcədən Azərbaycan türkcəsinə tərcümənin məntiqsizliyini vurğulayaraq qərarın türk dilinə aid olunmamasını, MTRŞ-nin öz qərarına yenidən baxmasını istədiklərini bəyan edib.

  Vüqar Bəyturan 1995-ci ildə ölkə konstitusiyasında dəyişiklik etməklə türk dilini Azərbaycan dili ilə əvəzləyən iqtidarın indi də sovetlər dövründə olduğu kimi Türkiyə ilə Azərbaycan xalqının inteqrasiyasını əngəlləmək cəhdində bulunmasını kəskin şəkildə pisləyərək bu qərarın dəyişilməsi üçün mübarizələrini davam etdirəcəklərini bildirib.

  Açıqlamasının sonunda türk millətçilərinin lideri 19 yanvar tarixində MTRŞ-nın qarşısında “türk dilinə qoyulan yasaq qaldırılsın!” və “xarici radiostansiyaların FM-də tezlikləri bərpa edilsin!” tələblərilə etiraz aksiyası keçirəcəklərini və bununla bağlı Bakı Şəhər İcra Hakimiyyətinə müraciət edəcəklərini də əlavə edib.

xeberler.az/Ellada