TƏHLÜKƏSİZLİK

The New Zealand Herald-ın məlumatına görə, Quantas şirkətinin aerobusu Hindistan üzərindən keçərkən qəflətən idarəsini itirib. Kəmərlərini bağlamamış sərnişinlər salonun tavanına dəyib, zədələr və ağır yaralar alıblar. Bir neçə dəqiqədən sonra idarəetmə yenidən bərpa olub və təyyarə qəza vəziyyətində enməni Qərbi Avstraliyanın hərbi aerodromunda edib.
Bu zaman zərərçəkmişlər məhkəmə iddiası qaldırır və mütəxxəssislər bunun səbəbini öyrənməyə çalışırlar. Onlar əvvəlcə təyyarənin sensor idarəetmə sisteminin donmasını yoxlayırlar. Bir müddət keçəndən sonra Quantasın rəsmi nümayəndələri hadisənin naviqasiya kompüterinin səhvi nəticəsində baş verdiyini deyirlər. Lakin mütəxxəssislərin son məlumatı çoxlarını heyrətə salır: ehtimal olunur ki, avtopilotdakı qəza sərnişinlərdən birinə məxsus elektron cihazın təsiri ilə baş verib. Bu, noutbuk, mobil telefon və ya oyun cihazı ola bilər.
Məlumdur ki, təyyarənin salonunda mobil telefon və ya noutbuklardan istifadə arzuolunmazdır. Lakin bəziləri bunu ciddi qəbul etmirlər.
Cihazla tanış olan insanlar təsdiq edirlər ki, idarəetmə siqnalları hava gəmisinin içində simsiz radioqurğulardan etibarlı ekranlaşdırılmış simlərlə ötürülür. Buna baxmayaraq, nəqliyyat təhlükəsizliyinin Avstraliya bürosunun tədqiqatçıları bu yaxınlarda Quantas şirkətinin aviareyslərindən birində baş vermiş qəzanın səbəblərini araşdırarkən aşkar ediblər ki, qəza zamanı sərnişinin simsiz mausu aerobusun kursunu üç dərəcə dəyişib.
Tədqiqat aparan komitənin rəhbəri Daily Mail-ə xəbər verib ki, baş verən hadisənin mexanizmini hələ tamam aydınlaşdıra bilməyiblər.