Hazırda 90-dan çox dövlət qurumu "ASAN müraciət" informasiya sisteminə inteqrasiya olunub. Beynəlxalq təcrübədə bu cür sistem 3-4 ölkədə mövcuddur. "ASAN müraciət" rahatlığı və funksionallığı ilə ən yaxşı sistemlərdən biridir. Təsadüfi deyil ki, 100-dən çox ölkə arasında Azərbaycanın "ASAN müraciət" sistemi BMT-nin xüsusi mükafatına layiq görülüb.
Xeberler.az məlumat verir ki, bu barədə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev “ASAN müraciət”in 2024-cü il üzrə hesabat tədbirində çıxışı zamanı deyib.
"ASAN müraciət" sistemində 25 mindən çox vətəndaş qeydiyyatdan keçib. Sistem ötən il daha çox vətəndaşın diqqətini cəlb edib. Bu, onu göstərir ki, gələcəkdə "ASAN müraciət"də qeydiyyatdan keçənlərin sayı ildən-ilə həndəsi silsilə ilə artacaq. Bu proses bizi sevindirməlidir. Çünki vətəndaşlar bizim görə bilməyəcəyimiz və ya gec görə biləcəyimiz problem barədə məlumat verəcək və biz onun həllinə nail olacağıq.
"ASAN müraciət"in unikallığı ondan ibarətdir ki, hər bir vətəndaş onu izləyə bilir: müraciət hansı quruma yönləndirildi, hansı icraçı ayrıldı, hansı zaman kəsiyində həll olunacaq. Sonda vətəndaş dövlət orqanlarının işini qiymətləndirir. Ona görə də dövlət qurumlarının nümayəndələrinə tövsiyə olunur ki, "ASAN müraciət" vasitəsilə daxil olan müraciətlərə həssaslıqla yanaşsın və cavabsız müraciət qalmasın", - deyə Ü.Mehdiyev qeyd edib.
