PROQRAMLAR

Elm və Təhsil Nazirliyinin İnformasiya Texnologiyaları İnstitutunun baş elmi işçisi texnika üzrə fəlsəfə doktoru, dosent Fərqanə Abdullayeva və institutun doktorantı Süleyman Süleymanzadənin həmmüəllifi olduqları “Qraf neyron şəbəkələrinin induktiv və zona bölünməsi funksiyaları əsasında informasiya axtarışında veb-səhifələrin ranqının qiymətləndirilməsi” (Estimating Page Ranks with Inductive Capability of Graph Neural Networks and Zone Partitioning in Information Retrieval) adlı məqalə “Web of Science” bazasına daxil olan “Automatic Control and Computer Sciences” jurnalında çap olunub.

Xeberler.az məlumat verir ki, məqalədə veb-səhifələrin ranqının (PageRank) hesablanması üçün zona əsaslı qraf neyron şəbəkələrindən (Graph Neural Networks, GNN) istifadə edən yanaşma təklif edilib.

Təklif olunan yanaşmanın əsas üstünlüklərindən biri odur ki, aparılan əməliyyatlar axtarış prosesini əhəmiyyətli dərəcədə sürətləndirir və miqyaslaşdırmanı təmin edir. Digər üstünlük GNN-lərin induktiv öyrənmə qabiliyyətidir. Hesablanmış “PageRank” qiymətləri informasiya axtarışı sistemlərində sıralama göstəricisi kimi istifadə oluna bilər. Burada istifadəçi sorğularına cavab olaraq tapılan səhifələrin daha əhəmiyyətlisi və etibarlısı yuxarı hissədə sıralanır. Bu da öz növbəsində axtarış sistemlərinin dəqiqliyini, istifadəçi məmnunluğunu və ümumi xidmət keyfiyyətini artırır.

“Automatic Control and Computer Sciences” jurnalı, həmçinin “Scopus” bazasında indeksləşir və elmmetrik göstəricilərə malikdir.