TƏDBİRLƏR

30 avqust 2018-ci il tarixdə Bakı şəhər 280 nömrəli tam orta məktəbdə “Təhsildə inkişaf və innovasiyalar üzrə ikinci qrant müsabiqəsi”nin fərdi kateqoriyasında qalib olan “İnternetdə Uşaqların təhlükəsizliyi” mövzusunda Bakı məktəbləri arasında birinci videoçarx müsabiqəsi layihəsinin təqdimat mərasimi keçirilib.

Xeberler.az məlumat verir ki, Bakı şəhər 280 nömrəli tam orta məktəbdə təşkil olunan layihənin təqdimat mərasimində müəllimlər, valideyinlər, layihənin eksperti, İKT-nin təhsildə tətbiqi üzrə Beynəlxalq ekspert Ramil Süleymanov iştirak edib.

Həmçinin, tədbirdə Azərbaycanda Filtirasiyalı İnternet xidmətini şagirdlər, valideyinlər və təhsil işçiləri üçün təqdim edən Enginet şirkətinin Marketinq və Satış Departamentinin rəhbəri Elmira xanım Abbasova da iştirak edib.

Belə ki, iştirakçılara layihə şərtlərini özündə əks etdirən təlimat materialları paylanılıb. Layihənin rəhbəri Sevinc Niftiyeva 3 ay müddətinə Bakının seçilmiş məktəbində təhsil alan müəllim, valideyin və şagirdlər, arasında reallaşdırılacaq layihənin əhəmiyyəti, mərhələləri və keçirilmə şərtləri haqqında ətraflı məlumat verib, iştirakçıların suallarını cavablandırıb. Daha sonra Layihənin ekspert Ramil Süleymanov bu layihə çərçivəsində layihə iştirakçılarının qazanacağı biliklər və onların gələcək həyatında rolu haqqında ətraflı məlumat verib. Enginet şirkətinin Marketinq və Satış Departamentinin rəhbəri Elmira xanım Abbasova bu layihənin təhsilimiz və onun gələcəyi üçün əhəmiyyətindən danışıb. Layihənin rəhbərinə bu layihədə Enginet şirkəti ilə əməkdaşlığı üçün də təşəkkür etdi. Birgə əməkdaşlığın davam edeəcəyini bildirdi. Elmira xanım, Enginet şirkətinin Birlink internet brendindən istifadə edən məktəblilər üçün bu layihə çərçivəsində Filtirasiya xidmətinin pulsuz veriləcəyini bildirib.

Qeyd edək ki, layihənin məqsədi məktəbdə uşaqların İnternetdən faydalı istifadə qaydalarını aşılamaq və onları mövcud təhlükələrdən qorumaqdır.

Vəzifələr:

• Şagird,müəllim və valideyinlərə Dünyada tətbiq olunan,Microsoft şirkətinin Shild Safety Online qlobal proqramı əsasında hazırlanmış 3 ayrı ayrı 8 saatlıq təlim paketi əsasında təlimləndirmək
• Yaradıcı şagirdləri aşkar etmək;
• onların biliklərinin təkmilləşməsi üçün ustad dərsləri təşkil etmək;
• bütün fəaliyyətləri sosiallaşdırmaq;
• bu şagirdlərin tədrisdə əldə etdikləri bilikləri gələcək yaradıcı şagirdlərə ötürməsini və həmyaşıtdan həmyaşıda davamlılığını təmin etmək.

Sevinc Niftiyeva rəhbərliyi ilə ümumi təhsil müəssisələri kateqoriyasında qalib olmuş layihənin icra müddəti 3 aydır. Qeyd edək ki, Təhsildə inkişaf və innovasiyalar üzrə ikinci qrant müsabiqəsi Azərbaycan Respublikası Təhsil Nazirliyi tərəfindən dövlət ümumi təhsil müəssisələri və bu müəssisələrdə çalışan pedaqoji işçilər üçün elan edilib.

Müsabiqə çərçivəsində ümumi təhsil müəssisələri kateqoriyası üzrə təklif olunmuş 800 layihədən 41, fərdi kateqoriya üzrə 125 layihə dəstəklənmişdir. Ümumilikdə 166 layihə qalib olub.

Xeberler.az