TƏDBİRLƏR

Xeberler.az bildirir ki, iyulun 3-də Təhsil nazirliyi tərəfindən elan olunan təhsildə inkişaf və innovasiyalar üzrə III qrant müsabiqəsinin yekunu ilə bağlı brifinq keçirilib. 

Müsabiqəyə ümumilikdə təhsil müəssisələri və pedaqoji işçilərdən 878 layihə təklifi daxil olub. Təşkilat komitəsi ekspert qrupunun rəyi əsasında ümumi təhsil müəssisələri kateqosiyası üzrə 53, fərdi kateqoriya üzrə 115 layihənin dəstəklənməsi məqsədə uyğun hesab olunub. Müsbət qərar verilən layihələr Təhsin Nazirliyi tərəfindən maliyyələşdiriləcək. 

Qaliblər ümumilikdə 44 şəhər və rayon təhsil müəssisələri və müəllimləri əhatə edir. Bakı, Gəncə, Sumqayıt, Göyçay, Bərdə, Şəki, Göygöl və Şəmkir qalib layihələr olan ən fəal rayon və şəhərlər olublar. 

Müsabiqəyə hər il 1 milyon manat vəsait ayrılır. Layihə təkliflərinin maliyyələşdirilməsində "Ümumi təhsil müəssisələri" kateqoriyası üzrə 100 min, fərdi kateqoriya üzrə 10 min manatdan çox olmamaq şərti ilə vəsait ayrılır. 

Qalib layihələrin icrasına avqustun 1-dən başlanılacaq. Layihənin icrasına maksimum 1 il vaxt verilir. Müsabiqədə qalib olmayan şəxslər iyulun 7-si saat 18:00-dək [email protected] ünvanına layihənin kateqoriyası, adı, layihə rəhbərinin adı və əlaqə nömrələrini göndərərək apellyasiya müraciəti edə bilərlər. 

Qeyd edək ki, müsabiqənin məqsədi təhsil müəssisələrində və təhsilverənlərdə sağlam rəqabəti və innovativ fəaliyyəti stimullaşdırmaqdır.