TƏHLÜKƏSİZLİK

Daxili İşlər Nazirliyinin (DİN) əməkdaşları tərəfindən vətəndaşların şəxsi məlumatları əsasında kütləvi maliyyə dələduzluğu, ayrı-ayrı şəxslərin bank hesablarına saxta sorğular verməklə pul vəsaitlərini talayan şəxs əməliyyat-texniki tədbirlər nəticəsində müəyyən olunaraq saxlanılıb.

Xeberler.az bildirir ki, DİN-in mətbuat xidmətindən verilən məlumata görə, 34 yaşlı Eldəniz Şayiq oğlu Qulamov qabaqcadan əlbir olan bir qrup şəxs tərəfindən elektron məlumat daşıyıcılarından və informasiya texnologiyalarından istifadə edilməklə oğurluq əməllərində şübhəli bilinir.

Müəyyən olunub ki, o, digər şəxslərlə birgə qabaqcadan əlbir olaraq müxtəlif sosial şəbəkə platformaları və messencer proqramları vasitəsilə vətəndaşların şəxsiyyət vəsiqələrini, pasportlarını və bank kartlarını əldə etməklə bir sıra cinayətkar əməllər törədib.

Cinayətkar fəaliyyətləri bununla məhdudlaşmayan şəxslər həmin sənədləri və bank kartlarının surətlərini kiberbunkerlərə transformasiyanı təşkil ediblər. Əsasən Feysbuk, İnstaqram, vatsap üzərindən danışıqlar aparan cinayətkar qrupun üzvləri özlərini bank-maliyyə, lombard, humanitar yardım və dövlət təşkilatlarının nümayəndəsi kimi təqdim etməklə fəaliyyət göstəriblər.

O da müəyyənləşdirilib ki, Azərbaycanda fəaliyyət göstərən bankların vəzifəli şəxslərinin fotolarını saxta profillərə yerləşdirməklə özlərini bank əməkdaşı kimi təqdim edib, vətəndaşların üz görüntülərinin videoqeydiyyatı aparılıb.

Bu və digər üsullarla vətəndaşlara vurulan zərər 300 min manatdan artıqdır.

Hazırda cinayət işi üzrə şübhəli şəxs və istintaqla şəxsiyyəti müəyyən olunan başqaları ilə bağlı tədbirlər davam edir.