İNTERNET

Azərbaycan Respublikasının Prezidenti İlham Əliyev tərəfindən təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na uyğun olaraq, AZCON Holding-ə daxil olan Aztelekom MMC tərəfindən fəaliyyətlər davam etdirilir.

Xeberler.az bildirir ki, Aztelekomdan verilən məlumata görə, layihə çərçivəsində Xocavənd rayonunun şəhər mərkəzi, Qırmızı Bazar və Hadrut qəsəbələri, həmçinin Sos, Xocavənd, Quzeyxırman, Güneyxırman, Xanoba və Tağverdi kəndlərində müasir texnoloji avadanlıqlar quraşdırılaraq telekommunikasiya xidmətləri istifadəyə verilib.

Nəticədə, rayon ərazisində internet də daxil olmaqla xidmətlər ümumilikdə 344 ev təsərrüfatını və 14 biznes subyektini əhatə edib.

Qarabağ regionu üzrə layihənin 2025-ci il mərhələsi çərçivəsində planlaşdırılan 25 magistral xəttin tikintisi də uğurla tamamlanıb. Ümumi uzunluğu 1000 kilometrə yaxın olan fiber-optik magistral şəbəkə regionda rabitə infrastrukturunun dayanıqlığını və təhlükəsizliyini təmin edən əsas baza rolunu oynayır.

Qeyd olunur ki, azad edilmiş ərazilərdə ümumilikdə 9 şəhər, 29 kənd və qəsəbədə rabitə infrastrukturu qurulub. Bu ərazilərdə 8 905 yeni abunəçi, o cümlədən 8 422 ev təsərrüfatı və 483 biznes subyekti şəbəkəyə qoşulub.

Layihə çərçivəsində tətbiq olunan GPON texnologiyası vasitəsilə abonentlərə yüksəksürətli internetlə yanaşı, “internet + telefoniya”, “internet + televiziya” və “internet + telefoniya + televiziya” paket xidmətləri təqdim olunur.

Vətəndaşlar xidmətlərə qoşulmaq üçün “Aztelekom”un 170 Çağrı mərkəzinə zəng edə, Xocavənd şöbəsinə müraciət edə və ya qurumun rəsmi internet səhifəsi vasitəsilə qeydiyyatdan keçə bilərlər.