TƏDBİRLƏR

Milli Müdafiə Universitetində rəqəmsal transformasiya və innovativ texnologiyalar mövzusunda seminar keçirilib

Xeberler.az məlumat verir ki, 2026-cı il 24 aprel tarixində Milli Müdafiə Universitetinin Hərbi Elmi Tədqiqat İnstitutunda “Rəqəmsal Transformasiya və İnnovativ Texnologiyalar” mövzusuna həsr olunmuş elmi seminar təşkil olunub. Tədbirdə Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətinin nümayəndələri iştirak ediblər.

Seminarı giriş nitqi ilə açan Milli Müdafiə Universitetinin elm və təhsil üzrə rektor müavini, professor, general-mayor Arif Həsənov çıxışında Prezidentin 27 fevral 2026-cı il tarixli sərəncamı ilə təsdiq edilmiş “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı”nın əhəmiyyətini vurğulayıb. O, bu sənəd çərçivəsində dövlət qurumları və təhsil müəssisələrinin üzərinə düşən vəzifələr, eləcə də milli müdafiə və təhlükəsizlik sistemində innovativ texnologiyaların tətbiqi perspektivləri barədə danışıb.

Daha sonra Xüsusi Rabitə və İnformasiya Təhlükəsizliyi Dövlət Xidmətinin baş idarə rəisinin müavini Tural Məmmədov “Kritik informasiya infrastrukturlarının qorunması kontekstində rəqəmsal transformasiya: milli strategiyalar, texnoloji trendlər və kibertəhlükəsizlik çağırışları” mövzusunda çıxış edib. O, kritik infrastruktur obyektlərinin təhlükəsizliyinin təmin olunmasında rəqəmsal texnologiyaların rolu, milli səviyyədə strateji yanaşmalar və mövcud təhdidlər barədə ətraflı məlumat verib.

XRİTDX-nin Kompüter İnsidentlərinə Qarşı Mübarizə Mərkəzinin rəisi Murad Balayev isə “Süni intellektin kibertəhlükəsizlik ekosistemində rolu: tətbiq istiqamətləri və adaptiv müdafiə yanaşmaları” mövzusunda təqdimatla çıxış edib. Təqdimatda süni intellektin kibertəhlükəsizlik sahəsində tətbiqi, “deepfake”, səs saxtalaşdırılması kimi müasir təhdidlər, eləcə də adaptiv və proaktiv müdafiə mexanizmləri izah olunub.

Seminar çərçivəsində dövlət qurumları və təhsil müəssisələrinin rolu, eləcə də milli müdafiə və kibertəhlükəsizlik sistemində innovativ texnologiyaların tətbiqi perspektivləri ətrafında müzakirələr aparılıb.