SÜNİ İNTELLEKT VƏ DATA

Bakı Ekspo Mərkəzində “ADEX 2026” 6-cı Azərbaycan Beynəlxalq Müdafiə Sərgisi çərçivəsində “Süni intellekt və təhlükəsiz rəqəmsal sistemlər: məlumatların idarə edilməsi və kiberdayanıqlılıq” mövzusunda innovasiya sessiyası keçirilib.

Xeberler.az bildirir ki, AzTU-nun Kibertəhlükəsizlik və Müdafiə Texnologiyaları İnstitutunun direktoru, dosent Rahid Ələkbərlinin moderatorluğu ilə təşkil olunan sessiyada Xüsusi Rabitə və İnformasiya Təhlükəsizliyi Dövlət Xidmətinin Kompüter İnsidentlərinə Qarşı Mübarizə Mərkəzinin rəisi Murad Balayev, İqtisadiyyat Nazirliyinin İnformasiya Texnologiyaları və Məlumat İdarəetmə Mərkəzinin layihə rəhbəri Tural Nağıyev, AzTU-nun Biotibbi Mühəndislik İnstitutunun böyük elmi işçisi Cavid Abbaslı, “Azərkosmos”un CİS Mərkəzinin Süni İntellekt bölməsinin rəhbəri Həmid Əskərov, “EUROMED” regionunda tərəfdaş şəbəkəsinin idarə edilməsi üzrə senior direktor Alper Soysal və “MegaSec” MMC-nin direktoru Qabil Qasımov iştirak ediblər.

Müzakirələr zamanı süni intellektin tənzimlənməsi, məlumatların idarə edilməsi, kibertəhlükəsizlik və təhlükəsiz rəqəmsal sistemlərin dayanıqlılığı ilə bağlı aktual məsələlər diqqət mərkəzində olub.

Sessiyanın əsas müzakirə mövzuları sırasında milli səviyyədə süni intellekt əsaslı monitorinq sistemləri və Milli CERT-in rolu, real vaxt rejimində qərar qəbuletmə ilə məlumatların qorunması arasında balans, tibbi süni intellekt standartlarının kritik infrastruktura tətbiqi, peyk görüntülərinin superrezolyusiya imkanları, rəqəmsal əkiz (Digital Twin) məlumatlarının idarə edilməsi və əqli mülkiyyətin qorunması, həmçinin kibertəhlükəsizlik üzrə ekspertizanın inkişafı və Azərbaycan dilində süni intellekt modellərinin yaradılması məsələləri yer alıb.

Müzakirələr zamanı süni intellekt sahəsində idarəetmənin lokallaşdırılması, kiberdayanıqlılığın biznes davamlılığı ilə əlaqələndirilməsi və rəqəmsal təchizat zəncirində məlumat suverenliyi məsələlərinin aktuallığı vurğulanıb.

Bununla yanaşı, texnoloji transformasiyanın və müasir texnoloji trendlərin universitetlərlə əməkdaşlıq çərçivəsində tətbiqi, eləcə də uğurlu təcrübələrin innovasiya ekosisteminə inteqrasiyasının əhəmiyyəti diqqətə çatdırılıb.

Sessiya çərçivəsində milli süni intellekt idarəçiliyi, kibermüdafiə və məlumat suverenliyi ilə bağlı məsələlər üzrə fikir mübadiləsi aparılıb.