Yeni nəsil şəxsiyyət vəsiqələrin verilməsi niyə gecikir?

25-12-2017 / 15:19

Məlumat verdiyimiz kimi, uzun müddətdir Nəqliyyat, Rabitə və Yüksək  Texnologiyalar Nazirliyi və Daxili İşlər Nazirliyi tərəfindən yeni nəsil şəxsiyyət vəsiqələrinin hazırlanması ilə bağlı işlər aparılır.

Xatırladaq ki, prezident İlham Əliyev bununla bağlı 2014-cü ilin, noyabrın 28-də sənəd imzalayıb.

Sənəddə qeyd edilib ki, Daxili İşlər Nazirliyi  şəxsiyyət vəsiqəsi verən yerli orqanlarının və şəxsiyyət vəsiqələrinin fərdiləşdirilməsi mərkəzlərinin təkmilləşdirilməsini, onların zəruri proqram-texniki vasitələrlə təchiz olunmasını həyata keçirməlidir.

NRYTN isə məsələ ilə bağlı yeni sertifikat xidmətləri mərkəzinin və onun ehtiyat mərkəzinin yaradılması, şəxsiyyət vəsiqəsi sahibinin gücləndirilmiş elektron imzasından istifadə ilə əlaqədar vətəndaşlardan daxil olan sualların operativ cavablandırılması məqsədi ilə telefon məlumat xidmətinin yaradılmasını və fəaliyyətini təmin etməsi həvalə edildi.

Nəzərdə tutulur ki, yeni şəxsiyyət vəsiqəsinə sahibinin elektron imzası və identifikasiyası ilə bağlı sertifikatlar daxil ediləcək.

Nəticədə yeni vəsiqələr şəxsiyyəti identifikasiya etməklə yanaşı, həmçinin, elektron sənədlərin imzalanmasında da istifadə ediləcək. Bununla da vətəndaşlar e-imza sertfikatı almaq məcburiyyətində qalmayacaq.

Sənədin üstündən 3 il keçməsinə baxmayaraq hələ də yeni nəsil vəsiqələri təqdim edilməyib.

Bir müddətə qədər deyildi ki, yeni vəsiqələr 2018-ci ildə istifadəyə veriləcək.

Nəqliyyat, rabitə və yüksək texnologiyalar nazirinin  müavini Elmir Vəlizadə jurnalistlərə açıqlamasında da bu vəsiqələrin gələn il təqdim ediləcəyini təsdiq etdi.

Lakin sonradan İKT sektorunda bununla bağlı müzakirələr başladı və vəsiqələrinin verilməsinin vaxtının yenidən uzadılacağı gündəmə gəldi.

Belə ki, yeni nəsil şəxsiyyət vəsiqələri 2018 yox, 2019-cu ildə təqdim ediləcəyi bildirildi.

Elə bunu Nəqliyyat, Rabitə və Yüksək  Texnologiyalar Nazirliyi ilə dəqiq etməyə çalışırdıq ki, nazir Ramin Quluzadə məsələyə aydınlıq gətirib.

Məlumat verdiyimiz kimi, ötən günlərdə Azərbaycandakı Amerika Ticarət Palatası Hewlett Packard Enterprise (HPE) şirkətinin dəstəyi ilə öz üzvləri üçün Ramin Quluzadənin iştirakı ilə aylıq işgüzar nahar təşkil edib.

Tədbirdə il ərzində İKT görülən işlərdən danışan nazir onu da bildirib ki, 2019-cu ildə yeni nəsil şəxsiyyət vəsiqələrinin vətəndaşlara verilməsi  də nəzərdə tutulur.

Vəsiqələrin verilməsini təmin edən Daxili İşlər Nazirliyi ilə də  əlaqə saxlayıb, məlumat öyrənməyə çalışdıq.

Nazirlikdən bildirilib ki, bu işə cavabdeh Nazirlər Kabinetidir. DİN sadəcə icraçı qurumdur.

Prezidentin sərəncamında şəxsiyyət vəsiqələrinin verilməsi və dəyişdirilməsi üçün Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin mərkəzlərində və əhaliyə səyyar xidmət göstərən nəqliyyat vasitələrində müvafiq proqram-texniki vasitələrin təchizatını və quraşdırılmasını təmin etməsi də qeyd edilib.

Məlumatımıza görə, məsələ ilə bağlı adı çəkilən qurumların bir neçə dəfə görüşü də keçirilib. Belə ki, İşçi Qrupu yeni nəsil şəxsiyyət vəsiqələrinin verilməsi ilə bağlı bütün məqamları müzakirə edib.

Qeyd edilir ki, artıq bu istiqamətdə işlə başa çatıb. Belə desək, yeni vəsiqələr artıq istifadəyə hazırdır.

Ekspertlər də bildirir ki, bununla bağlı bütün işlər başa çatıbsa, niyə proses bu qədər ləngiyir?

İndiki məqamda gecikmə ilə bağlı qurumların açıqlaması faydalı olardı.

Məltəm Talıbzadə

 

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.