MÜSAHİBƏ

Sentyabr ayından etibarən üzərində vətəndaşların yaşayış yeri üzrə qeydiyyatı, ailə vəziyyəti haqqında məlumatlar, habelə şəxsiyyət vəsiqəsi sahibinin biometrik fotosu və digər fərdi göstəriciləri özündə birləşdirən elektron daşıyıcı (çip) yerləşdirilən "yeni nəsil" şəxsiyyət vəsiqələrinin verilməsi gözlənilirdi. Hazırki durumda isə prosesin həyata keçirilməsində bəzi problemlər yaranıb.

Məsələylə bağlı Azərbaycan İnternet Forumunun prezidenti Osman Gündüz Xeberler.az-a  açıqlama verib:

"Yeni nəsil şəxsiyyət vəsiqələri ilə bağlı əvvələr bizim anlaşılmazlıq hesab etdiyimiz problem xeyli ciddiləşib. Əslində, hələlik görünən odur ki vəsiqələrdəki “yeni nəsil” termini öz mahiyyətini doğrultmayıb.  Verilən vəsiqələrin heç birində e-imza aktivləşdirilmir. Və ən qəribəsi də odur ki, heç kim bunun səbəbini açıqlamır. Anlaşılmaz situasiyanın nə vaxtadək davam edəcəyi və burada kimlərin nə məqsədi olduğu hələ də bilinmir.  Amma istənilən halda uzun illər hazırlıq görülən, Prezident səviyyəsində açıqlamalar verilən, ölkədə informasiya cəmiyyətinin formalaşmasında mühüm əhəmiyyət kəsb edən bir layihəyə belə yanaşma doğru deyil."

Uzun müddətdir e-imza ilə bağlı bütün hazırlıq işlərinin Nəqliyyat, Rabitə və Yüksək Texnologiyalar Nazirliyi  tərəfindən başa çatdırıldığı elan olunub. Bəs kimdir və ya kimlərdir mane olan, hansı qurumların maraq toqquşmaları var burada ? Osman Gündüz bu suallara da aydınlıq gətirib:

"Ola bilər ki, hər ay ASAN imzadan 0.5 milyon manat qazanc götürənlərin maraqlarına uyğun deyil, ola bilər vəsiqədə yerləşdiriləcək imzadan istifadə ilə bağlı müəyyən olunacaq rüsumun məbləği üçün razılıq əldə olunmur. Düzü , müxtəlif versiyalar olsa da konkret çətindir fikir bildirmək. Amma problem göz qabağındadır."

Ekspert son olaraq  problemin tezliklə həllini tapacağına ümid etdiyini vurğulayıb:

"Mövcud situasiyadan belə qənaətə gəlmək olar ki, hətta Prezidentə də bununla bağlı yalan məlmatlar verilir ki, sanki hər şey qaydasındadır. Reallıq isə odur ki hələlik “yeni nəsil”in əsas atributundan əsər əlamət yoxdur. Düşünürəm ki , ləngimədən əsas aidiyyatı qurumlar, İqtisadiyyat Nazirliyi, NRYTN, Ədliyyə Nazirliyi DİN və digər qurumların rəhbərləri bir araya gəlib bu məsələni həll etməlidirlər.
Ümid edirəm bu cür xırda bir məsələnin də həlli üçün Prezidentin müdaxiləsinə ehtiyac qalmayacaq"