PROQRAMLAR

Azərbaycanda yerli bizneslərin texnoloji transformasiyasını sürətləndirmək imkanlarını gücləndirmək məqsədilə “Sənaye 4.0 Hazırlıq Proqramı”na qeydiyyat üçün nəzərdə tutulan “industry4.az” portalı istifadəyə verilib.

Xeberler.az İqtisadiyyat Nazirliyi yanında IV Sənaye İnqilabının Təhlili və Koordinasiyası Mərkəzinə (4SİM) istinadən məlumat verir ki, “Sənaye 4.0 Hazırlıq Proqramı” texnologiyaların tətbiqi və mənimsənilməsi vasitəsilə müəssisələrin səmərəliliyini artırmaq, onların uzunmüddətli davamlı inkişafına dəstək məqsədi daşıyır, ölkədə rəqəmsal iqtisadiyyatın inkişafına töhfə vermək üçün strateji əhəmiyyət kəsb edir.

Proqram çərçivəsində aşağıdakı fəaliyyətlər nəzərdə tutulur:

• Şirkətlərin mövcud texnoloji bacarıqlarının və potensialının qiymətləndirilməsi;
• Texnoloji transformasiyaya dair yol xəritələrinin hazırlanması;
• Yol xəritəsinin icrasında zəruri maliyyə dəstəyinin ayrılması;
• Texnoloji bilik və bacarıqların gücləndirilməsi;
• İcra dəstəyinin göstərilməsi.

Müəssisələr ilkin məlumatları təqdim edərək “industry4.az” platformasında qeydiyyatdan keçə bilərlər. İlkin seçim mərhələsini uğurla keçən müəssisələr proqram çərçivəsində ətraflı dəstək almaq imkanı əldə edəcəklər. Hər bir müəssisə üçün proqramın müddəti 3-4 ay təşkil edəcək.