E - HÖKUMƏT

Xəbər verdiyimiz kimi, Multimedia Mərkəzi tərəfindən Beynəlxalq Mətbuat Mərkəzində “Dövlət qurumlarının onlayn şəffaflıq vəziyyəti: problemlər və perspektivlər” mövzusunda Dəyirmi Masa keçirilir.

Xeberler.az-ın məlumatına görə, tədbirdə Multimedia Mərkəzinin direktoru, Azərbaycan İnternet Forumunun prezidenti Osman Gündüz informasiya  açıqlığı üzrə Mərkəzi və yerli icra   qurumlarının növbəti Hesabatını və Reytinq  Cədvəlini ictimaiyyətə təqdim edib.

O, 4 ay ərzində  73 Mərkəzi icra orqanının  və 68 Yerli icra hakimiyyətlərinin rəsmi internet resursunun monitorinqinin aparıldığını qeyd edib.

Osman Gündüz  rəsmi saytların 60  parametr üzrə kəmiyyət  və  keyfiyyət kriteriyaları və sosial əhəmiyyətlilik səviyyəsi nəzərə alınmaqla informasiya  açıqlığı  vəziyyətinin analiz olunduğunu  bildirib.  

Hər bir qurum üzrə araşdırmaların yekunu olaraq icmal və tövsiyələr hazırlandığı diqqətə çatdırıb.

Osman  Gündüz  Mərkəzi icra orqanlarında informasiya açıqlığı sahəsində əvvəlki illərlə müqayisədə müsbət irəliləyişlərin olduğunu  qeyd edib.

Monitorinqin nəticələrinə əsasən informasiya  açıqlığı üzrə Reytinq Cədvəlində 1-ci , 2-ci və 3-cü yerləri müvafiq olaraq  Vergilər Nazirliyi (78.2 faiz), Dövlət Qulluğu Məsələləri üzrə Komissiya (76.3 faiz) və Əmək və Əhalinin Sosial Müdafiəsi Nazirliyi ( 76 faiz) tutub. 

Sonuncu yerlər isə Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası, Dövlət Sərhəd Xidməti  və Nazirlər Kabinetinə məxsusdur. 

73 Mərkəzi icra qurumları üzrə orta informasiya  açıqlığı  göstəricisi  56 faiz ( 2013-cü ildə 39 faiz,  2012-ci ildə 33.5 faiz) olub.

Cari ildə 73 dövlət qurumundan  55-i informasiya açıqlığı üzrə 50 faizlik həddi keçə biliblər.

2013-cü ildə cəmi  21 qurum informasiya açıqlığı üzrə 50 faizlik həddi keçə bilib, 2012-ci ildə  cəmi  15 qurumun açıqlıq göstəricisi 50 faizdən yüksək olub,  2011-ci ildə isə cəmi  3 dövlət qurumunun informasiya açıqlığı  50faizlik həddi  aşıb. 

Yerli icra hakimiyyətləri (şəhər və rayon) üzrə orta informasiya açıqlığı göstəricisi isə cəmi 15 faiz ( ötən il : 12.7 faiz) olub. 

Yerli icra qurumların informasiya açıqlığı sahəsində ciddi problemlərin qaldığı diqqətə çatdırılıb. Ötən illərlə müqayisədə  yerli icra orqanlarında , rayon və çəhər icra hakimiyyətlərinin rəsmi saytlarında hər hansı bir ciddi dəyişiklik baş vermədiyi bildirilib. Qeyd edilib ki bu qurumların saytlarının hamısı bir-birini təkrarlayır, açıqlanması məcburi olan infromasiyalarn 80-90 faizi rəsmi saytlarda yoxdur.

Tədbirdə informasiya  açıqlığı sahəsində dövlət  qurumları arasında kəskin informasiya bərabərsizliyi olduğu da qeyd olunub. Belə  ki cari ildə 10 ən yaxşıların açıqlıq göstəricisi 75 faiz olduğu halda ,  sonuncu yerləri tutan 10  dövlət qurumunun açıqlıq əmsalı cəmi  26 faizdir.

Qeyd edək ki, tədbirdə dövlət orqanlarının, Vətəndaş Cəmiyyəti subyektləri və beynəlxalq təşkilatların nümayəndələri, eləcə də mətbuat nümayəndələri iştirak edir.

Tədbirdəki çıxışlarda Monitorinqin nəticələrinin ictimailəşdirilməsinin və davamlı olaraq  aparılmasının  zəruriliyi qeyd olunub.

Məltəm Talıbzadə