MOBİL RABİTƏ

Xəbər verdiyimiz kimi, “Dövlət rüsumu haqqında” qanuna edilən dəyişikliklərə əsasən mobil rabitə xidmətlərinə lisenziyaların verilməsinə görə dövlət rüsumu 182 dəfə artırılaraq 1 milyon manata qaldırılıb.

İndiyədək bu xidmət üçün lisenziya alarkən cəmi 5500 manat ödəmək lazım gəlirdisə, qanuna edilən dəyişiklikdən sonra arıtq bununla bağlı rüsum 1 000 000 (bir milyon ) manat müəyyən olunub.

Onu da xatırladaq ki, Prezidentin fərmanı ilə artıq qüvvədə olan bütün lisenziyalar da müddətsiz elan edilib.

Maraqlıdır ki, bu yeni dəyişiklik hazırda fəaliyyət göstərən mobil operatorlara da şamil ediləcək, yoxsa söhbət yalnız bazara yeni daxil olacaq mobil operatorlardan gedir? Əgər yeni qanun bazarda olan mobil operatorlara aid deyilsə, yeni mobil operatorun bazara daxil olması gözlənilirmi?

Məsələ ilə bağlı ötən gün keçirilən mətbuat konfransında Azercell şirkətinin prezidenti Vahid Mürsəliyev Xeberler.az-ın sualını cavablandırarkən deyib ki, yeni lisenziya bazara yeni daxil olacaq operatorlara aiddir.

Onun sözlərinə görə, Azercell 3G üçün lisenziya alsa da, 4G xidməti üçün hələ lisenziya almayıb:

“Şirkətimiz 4G üçün lisenziya almayıb. Buna səbəb isə biz bu xidmətə başlayan zaman qanunvericilikdə 4G üçün lisenziyası almaq tələb edilmirdi. Məlum olduğu kimi, Prezident İlham Əliyev ötə ilin sonlarına doğru yeni fərman imzaladı. Qeyd edildi ki, hər bir yeni nəsil texnologiyaya uyğun xidmət göstərən operatorlar müvafiq lisenziya almalıdır”.

Şirkət rəhbəri qeyd edib ki, bununla bağlı Nəqliyyat, Rabitə və Yüksək Texnologiyalar Nazirliyi ilə sıx əməkdaşlıq edirlər:

“Hazırda yeni qanunun tənzimlənməsi ilə bağlı işlər gedir. Güman edirik ki, yaxın zamanda bununla bağlı şərtlər bəlli olacaq. Əgər qanun tələb edərsə, Azercell də lisenziya üçün ödəniş edəcək”.

Məltəm Taləbzadə