TƏDBİRLƏR

Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətində ABŞ Dövlət Departamentinin Bureau of Cyberspace and Digital Policy nümayəndə heyəti ilə işgüzar görüş keçirilib.

Xeberler.az bildirir ki, görüş 10 fevral 2026-cı il tarixində Azərbaycan ilə United States arasında imzalanmış Strateji Tərəfdaşlıq Xartiyası çərçivəsində baş tutub. Görüşün əsas məqsədi sənəddə müəyyən olunmuş prioritetlər üzrə kibertəhlükəsizlik, rəqəmsal inkişaf və süni intellekt sahələrində ikitərəfli əməkdaşlığın mövcud vəziyyəti və perspektivlərini qiymətləndirmək olub.

Müzakirələr zamanı dövlət sistemlərində informasiya təhlükəsizliyinin təmin edilməsi üzrə qabaqcıl təcrübələr, təhlükəsizlik siyasətləri və ölçmə mexanizmləri, kibergigiyena, kiberdiplomatiya və beynəlxalq kibersiyasət təşəbbüsləri diqqət mərkəzində olub. Eyni zamanda, Software Engineering Institute, MITRE Corporation və CRDF Global ilə mümkün əməkdaşlıq istiqamətləri də müzakirə edilib.

Görüşdə yeni nəsil kibertəhdidlərlə mübarizə, təcrübə mübadiləsi və informasiya təhlükəsizliyinin gücləndirilməsi məqsədilə birgə layihələrin icrası məsələləri də nəzərdən keçirilib.

Bununla yanaşı, süni intellekt texnologiyalarının təhlükəsizlik sistemlərinə inteqrasiyası, bu sahədə təhlükəsizlik tələbləri, xarici AI həllərinin istifadəsi zamanı mümkün məlumat sızmaları və süni intellekt üçün ayrıca kibergigiyena qaydalarının formalaşdırılması zəruriliyi müzakirə olunub.

ABŞ Dövlət Departamentinin nümayəndə heyəti Azərbaycanla texniki əməkdaşlığı dərinləşdirməyə hazır olduqlarını bildirib.

Qeyd olunub ki, Xüsusi Rabitə və İnformasiya Təhlükəsizliyi Dövlət Xidmətinin CERT mərkəzi vasitəsilə ABŞ-nin ixtisaslaşmış qurumları ilə tərəfdaşlığın genişləndirilməsi kibertəhdidlərə qarşı mübarizədə hər iki tərəfin mövqeyinin gücləndirilməsinə töhfə verə bilər.