AZNET

Xəbər verildiyi kimi, “İntelsat 33" peyk operatoru Dağlıq Qarabağdakı qondarma rejimin ”Artsax TV" adlı telekanalını yayımlamağa başlayıb. Belə ki, erməni separatçılarının telekanalı bu peykdə yanvarın 6-dan görünməyə başlayıb və HD formatında yayımlanmaqdadır. Hətta belə məlumatlar var ki, “Artsax TV” Qarabağa turist cəlb etmək üçün təbliğat xarakterli reklam proqramları, verilişlər təqdim edir.

Amerika peykində olan “İntelsat 33" peyk operatoru 2017-ci ildən fəaliyyət göstərir və Avropanı, Asiyanı, Yaxın Şərqi, Afrikanı, Aralıq dənizi və Hind okeanı regionlarını əhatə edir. Bu isə o deməkdir ki, Qarabağın separatçı ermənilərinin telekanalına Türkiyə, Gürcüstan, İran, Rusiyanın bir hissəsi, Ukrayna, bir sıra Avropa və Yaxın Şərq ölkələrində baxa bilərlər.

Nəqliyyat, Rabitə və Yüksək Texnologiyalar Nazirliyinin mətbuat katibi Zamirə Ədilova mediaya açıqlamasında bu mövzu ilə bağlı cavab veriləcəyini qeyd edib. Xarici İşlər Nazirliyindən də hələlik rəsmi münasibət olmayıb.

Xeberler.az  məlumat verir ki, Qarabağ Azadlıq Təşkilatının sədri Akif Nağı isə “Yeni Müsavat”a bildirdi ki, dövlət tərəfindən ciddi addımlar atılmasa, ABŞ səfirliyi qarşısında bir həftə aksiya  keçirəcəklər. Onun sözlərinə görə, ermənilərin telekanal açması ABŞ rəhbərliyi səviyyəsində razılaşdırılıb: “Azərbaycan bu məsələdə sərt mövqe tutmalıdır. Sözsüz ki, Amerikaya qarşı sərt addımların atılmasının nəticəsi olmayacaq. Bəllidir ki, ABŞ qondarma rejimi himayə edirsə, bu telekanalın fəaliyyətə başlaması da dövlət səviyyəsində həll olunub. Amma Azərbaycan danışıqlardan imtina etməlidir”.

QAT sədri hesab edir ki, Ermənistan mövqeyindən çəkilmir, ATƏT-in Minsk Qrupu tərəfindən anti-Azərbaycan addımlar atılır: “Bu halda biz nəyi müzakirə edirik? Yanvarın 16-da nazirlərin görüşü keçiriləcək. Ermənistan bəyan edir ki, Qarabağ məsələsini bitirmişik. Onda hansı danışıqları aparırıq? Azərbaycan amerikalı həmsədrin olduğu ATƏT-in Minsk Qrupundan danışıqlardan çıxmalıdır. Eyni zamanda Türkiyədə ermənilər telekanal açdılar. Adını qoyublar ki, guya erməni mədəniyyətinin təbliğatına hesablanıb. Amma əmin olun ki, Azərbaycana qarşı siyasət aparacaqlar. Türkiyə niyə buna şərait yaradır, başa düşülmür.  Bundan əvvəl də ”Aqos" qəzeti nə oyunlardan çıxırdı. Bilmirəm bu, yanlış siyasətin nəticəsidir, yoxsa Türkiyə ikili standartlarla oynayır. Hər halda, Azərbaycan dövlətindən ciddi addımlar gözləyirik. Əgər addım atılmasa, QAT ABŞ səfirliyi önündə bir həftə aksiya keçirəcək".

A.Nağı onu da bildirdi ki, teleməkanda bir yox, bir neçə Qarabağ telekanalı fəaliyyətə başlamalıdır: 

“Həm də internet telekanalları olmalıdır. Niyə Qarabağla bağlı televiziyamız olmasın? Üstəlik, bir neçə dildə fəaliyyət göstərməlidir ki, daha geniş auditoriya qarşısına çıxa bilsin”.

Bildirək ki, beynəlxalq telekommunikasiya nəhəngi “İntelsat” 50 süni peyki idarə edir və mənzil-qəragahı ABŞ-da və Lüksemburqda yerləşir. “İntelsat 33" peyki Amerikanın ”Boeing" korporasiyası tərəfindən istehsal edilib.

Deputatlar Aqil Abbas və Elman Məmmədov, ekspert Osman Gündüz rəsmi Bakının Qarabağ ermənilərinin telekanalının ABŞ peyki ilə yayımlanmasına qarşı təcili hərəkətə keçməsinin vacibliyini vurğulamışdılar.