NƏQLİYYAT

Mərakeşdə keçirilən Beynəlxalq Mülki Aviasiya Təşkilatının 5-ci “Qlobal İcra Dəstəyi Simpoziumu” çərçivəsində Azərbaycan nümayəndə heyətinin bir sıra mühüm görüşləri baş tutub.

Xeberler.az bildirir ki, Rəqəmsal inkişaf və nəqliyyat nazirinin müavini Samir Məmmədovun rəhbərlik etdiyi nümayəndə heyəti ICAO Şurasının prezidenti Toşiyuki Onuma və təşkilatın baş katibi Xuan Karlos Salazar ilə görüş keçirib.

Görüş zamanı Azərbaycan tərəfi ölkədə aviasiya sahəsinin inkişafı, eləcə də dayanıqlı aviasiya yanacağı üzrə ACT-SAF proqramı və “Ələt Yaşıl Hava Limanı” layihəsi daxil olmaqla ICAO ilə əməkdaşlığın mövcud vəziyyəti barədə məlumat verib.

Həmçinin ICAO ilə Dövlət Mülki Aviasiya Agentliyi arasında təlim xidmətlərinə dair razılaşma imzalanıb.

Simpozium çərçivəsində Azərbaycan nümayəndə heyəti ilə Mərakeş Krallığının nəqliyyat və logistika naziri Abdessamad Kayuh arasında da görüş keçirilib.

Görüşdə nəqliyyat sahəsində qarşılıqlı maraq doğuran məsələlər və əməkdaşlığın genişləndirilməsi perspektivləri müzakirə olunub. Eyni zamanda iki ölkə arasında müntəzəm uçuşların açılması və hava əlaqələrinin inkişaf etdirilməsinin vacibliyi vurğulanıb.

Tərəflər mülki aviasiya sahəsində əməkdaşlığın hüquqi bazasının formalaşdırılması məqsədilə hava əlaqəsi haqqında hökumətlərarası sazişin qısa müddətdə imzalanması barədə razılığa gəliblər.