Mərakeşdə Beynəlxalq Mülki Aviasiya Təşkilatı (ICAO) tərəfindən təşkil olunan 5-ci “Qlobal icra dəstəyi simpoziumu”nun açılış mərasimi baş tutub.
Xeberler.az bildirir ki, “Regional həllər, qlobal faydalar” mövzusuna həsr olunan tədbirdə Azərbaycan rəqəmsal inkişaf və nəqliyyat nazirinin müavini Samir Məmmədovun rəhbərlik etdiyi nümayəndə heyəti iştirak edir.
Bildirilib ki, simpozium ICAO-nun uzunmüddətli strateji məqsədlərinə nail olunması, ümumi icra problemlərinin aradan qaldırılması və dayanıqlı aviasiyanın təşviqi baxımından mühüm platforma rolunu oynayır.
Tədbir çərçivəsində 40-dan artıq ölkənin nümayəndələrinin iştirakı ilə nazirlərin dəyirmi masası keçirilib. Bununla yanaşı, Ələt Azad İqtisadi Zonası ərazisində yerləşən “Silk Way Cargo Village” və hava limanı layihəsinin yaşıl sertifikatlaşdırılması məqsədilə ICAO ilə Ələt Hava Limanı İdarəsi arasında əməkdaşlığa dair razılaşma imzalanıb.
Həmçinin yüksəksəviyyəli görüşdə üzv dövlətlərin nümayəndələri tərəfindən aviasiyanın davamlı və dayanıqlı inkişafına dair fəaliyyətə çağırış olan “Call to Action” sənədi qəbul edilib.
Qeyd edək ki, simpozium aprelin 16-dək davam edəcək.
