PROQRAMLAR

Son illərdə Azərbaycanda kibertəhlükəsizlik sahəsində ardıcıl və sistemli dövlət siyasəti həyata keçirilir. İnformasiya təhlükəsizliyinin milli təhlükəsizliyin əsas komponentlərindən biri kimi müəyyənləşdirilməsi bu istiqamətdə institusional yanaşmanı daha da gücləndirib.

Xeberler.az bildirir ki, bu kontekstdə Prezident İlham Əliyev tərəfindən təsdiq olunmuş “Azərbaycan Respublikasının informasiya təhlükəsizliyi və kibertəhlükəsizliyə dair 2023–2027-ci illər üçün Strategiyası” ölkənin rəqəmsal təhlükəsizlik arxitekturasının formalaşmasında əsas yol xəritəsi kimi çıxış edir.

Strategiyadan irəli gələn vəzifələrin icrası çərçivəsində Elm və Təhsil Nazirliyinin (ETN) İnformasiya Texnologiyaları İnstitutu tərəfindən kibertəhlükəsizlik infrastrukturu gücləndirilir, AzScienceNet Şəbəkə İdarəetmə Mərkəzinin AzScienceCERT xidmətinin imkanları genişləndirilir və beynəlxalq əməkdaşlıq mexanizmlərinə inteqrasiya dərinləşdirilir.

Bu istiqamətdə mühüm nəticələrdən biri AzScienceCERT xidmətinin “TF-CSIRT Trusted Introducer” birliyi tərəfindən növbəti dəfə uğurla akkreditasiya olunmasıdır.

Qeyd edək ki, TF-CSIRT Trusted Introducer 2000-ci ildə Avropanın aparıcı kibertəhlükəsizlik qrupları tərəfindən yaradılıb və kompüter insidentlərinə qarşı mübarizədə beynəlxalq əməkdaşlığın gücləndirilməsini, operativ məlumat mübadiləsini və təhlükəsizlik qrupları arasında koordinasiyanı təmin edir.

Azərbaycanda fəaliyyətə başlayan ilk CERT strukturu olan AzScienceCERT 2010-cu ildə yaradılıb və elm və təhsil şəbəkəsində informasiya təhlükəsizliyi insidentlərinə cavab vermək üzrə ixtisaslaşıb. 2015-ci ildə GEANT Assosiasiyasında milli elm və təhsil şəbəkəsi operatoru statusu əldə edilməsi bu strukturun inkişafına mühüm töhfə verib.

AzScienceCERT beynəlxalq CERT təşkilatları ilə əməkdaşlıq edir, təcrübə mübadiləsi aparır və qlobal kibertəhlükəsizlik təşəbbüslərində fəal iştirak edir.

Qurumun əsas missiyası AzScienceNet şəbəkəsində informasiya təhlükəsizliyi risklərinin idarə olunması, kritik infrastrukturun qorunması və dayanıqlı fəaliyyətin təmin edilməsidir. Eyni zamanda, minlərlə alim, müəllim, tələbə və doktorant üçün kibertəhlükəsizlik sahəsində geniş imkanlar yaradır və elmi-tədqiqat mühitində eksperimental baza rolunu oynayır.

Xatırladaq ki, AzScienceCERT 30 may 2011-ci ildə beynəlxalq səviyyədə akkreditasiyadan keçib və həmin vaxtdan etibarən mütəmadi beynəlxalq qiymətləndirmələrdən keçərək fəaliyyətini təkmilləşdirib. Bu il də akkreditasiya TF-CSIRT çərçivəsində əməkdaşlığın davamlılığını və qurumlar arasında etimadın gücləndirilməsini əks etdirir.