TƏDBİRLƏR

Azərbaycan Texniki Universitetində (AzTU) Rəqəmsal Transformasiya Şurasının növbəti iclası keçirilib.

Xeberler.az məlumat verir ki, toplantıda Mərkəzi Bankın nümayəndələri də iştirak ediblər.

İclası açan Rəqəmsal Transformasiya Şurasının sədri Telman Axundov ötən dövr ərzində görülən işlər barədə məlumat verib. AzTU-nun rektoru Vilayət Vəliyev isə universitetdə həyata keçirilən rəqəmsal transformasiya prosesi, icra olunan rəqəmsal layihələr və gələcək hədəflər barədə Şura üzvlərini məlumatlandırıb.

Bildirilib ki, gələn ildən Elm və Təhsil Nazirliyinin Yüksək Texnologiyalar Parkında yaradılan "SABAH.city" kampusu fəaliyyətə başlayacaq. Qeyd olunub ki, kampusun əsas məqsədi innovasiya yönümlü akademik mühitin formalaşdırılması, güclü akademik ekosistemin yaradılması və tələbələrin sürətlə dəyişən əmək bazarının tələblərinə uyğun hazırlanması üçün innovativ təhsil modellərinin tətbiqidir.

Toplantıda cari ilin əvvəlində Mərkəzi Bank və Azərbaycan Fintex Assosiasiyasının (AzFİNA) təşəbbüsü ilə AzTU-da yaradılmış FinTex Lab çərçivəsində keçirilən təlimləri uğurla başa vuran tələbələrə diplom və hədiyyələr təqdim olunub.

Mərkəzi Bankın baş direktoru Sadiq Axundov və AzFİNA-nın rəhbəri Edqar Abdullayev çıxışlarında FinTex Lab layihəsinə dəstəyin davam etdiriləcəyini bildiriblər.

İclasda, həmçinin AzTU İnkubasiya Mərkəzində həyata keçirilən proqramlar, universitetdə startap və innovasiya ekosisteminin inkişafı, eləcə də universitetin yeni Rəqəmsal Transformasiya Konsepsiyası layihəsi barədə təqdimatlar olub.

Sonda bildirilib ki, konsepsiya layihəsinin növbəti iclasda daha geniş tərkibdə müzakirə edilərək AzTU-nun Elmi Şurasına təqdim olunması planlaşdırılır.