PROQRAMLAR

Bu gün ailədən söz açanda, ilk növbədə, milli kimliyimizdən, cəmiyyətimizin ahəngindən və gələcəyimizi necə qurmalı olduğumuzdan danışmalıyıq. Qarşımızda duran əsas vəzifə isə bu mənəvi birliyi qorumaqla yanaşı, ailə institutunun qarşısında dayanan yeni çağırışlara da adekvat cavab verməkdir.

Xeberler.az məlumat verir ki, bu fikirləri Ailə, Qadın və Uşaq Problemləri üzrə Dövlət Komitəsinin sədri Bahar Muradova qurumun təşkilatçılğı ilə keçirilən I Ailə Forumunda səsləndirib.

Onun sözlərinə görə, məhz buna görə bugünkü forumun seçilmiş mövzusu da kifayət qədər aktualdır. Hazırda elə bir dövrdə yaşayırıq ki, müasir texnologiyalar ünsiyyətimizi, işimizi, təhsil imkanlarımızı və gündəlik həyatımızı çox böyük sürətlə dəyişməkdədir. Bu dəyişikliklər ilk növbədə ailə münasibətlərinə, valideynlik məsuliyyətinə, uşaqların inkişafına və insanların sosial rifahına birbaşa təsir göstərir.

"Müasir texnologiyalar bizi yaxınlaşdırmaqla yanaşı, bəzən aramızdakı canlı ünsiyyətin zəifləməsinə, görünməz divarların yaranmasına səbəb olur. Süni intellekt isə seçimlərimizə və məlumatı qavramağımıza təsir edən tamamilə fərqli reallıqdır. Ona görə də bugünkü müzakirədə əsas məqsədimiz texnoloji yeniliklərə ailələrimizin həyat tərzini və gələcək inkişafını əhatə edən kompleks sosial proses kimi yanaşmaq, onların ailənin möhkəmliyinə və gələcək nəsillərə potensial təsirlərini düzgün istiqamətə yönəltmək barədə danışmaqdır. Xüsusilə uşaqların rəqəmsal təhlükəsizliyi məsələsində ailənin rolu birmənalı olaraq əvəzolunmazdır", - deyə B.Muradova əlavə edib.