Uşaqların internet təhlükəsizliyi ilə bağlı yeni qanun layihəsi hazırlanır

27-09-2016 / 11:22

Məlum olduğu kimi, bu gün uşaqların internet təhlükəsizliyi ən aktual mövzulardandır.

İnternetin, kommunikasiya vasitələrinin gətirdiyi yeniliklər bəzi vaxt mənfi formada öz təsirini göstərir.

Böyük yaşlı insanlar bu mənfi təsirlərini qarşısını alıb, məlumatları süzgəcdən keçirə bilir. Təəssüflər olsun ki, kiçik yaşlı uşaqların internetdən istifadəsində bəzi vaxt problemlər yaşanır.Belə ki, əksər vaxt valideynlər də övladlarının internetdən istifadəsinə nəzarət edə bilmir. Bəzən uşaqların sağlamlığı, psixologiyası üçün zərərli informasiyaların təsnifatını aparmaq, hansının faydalı və ya zərərli olduğuna nəzarət etmək çətin olur. 

Bu problemləri nəzərə alaraq ölkədə yeni layihəyə başlanıb.

Belə ki, yeni layihədə uşaqları arzuolunmaz informasiyalardan qorumaq üçün vahid normativlər müəyyən ediləcək.  

Hazırda bu istiqamətdə görülən işlər barədə Ailə Qadın və Uşaq Problemləri üzrə Dövlət Komitəsi ilə əlaqə saxladıq.

Komitədən Xeberler.az-a bildirlib ki,  2016-cı il  aprelin 19-da “ Uşaq hüquqları haqqında Azərbaycan Respublikasının qanunu” na  dəyişikliklər edilib.

Həmin dəyişikliklərə  əsasən uşaqların sağlamlığına, inkişafına zərər verən informasiyalardan qorunması müvafiq qanunla tənzimlənir:

“ Bu o deməkdir ki, xüsusi bir qanun qəbul edilməlidir. Həmin qanunda uşaqların yaş kateqoriyalarına görə informasiya məhsullarının təsnifatı aparılacaq. Prezidentin sərancamına əsasən həmin qanunun hazırlanması Ailə Qadın və Uşaq Problemləri üzrə Dövlət Komitəsi, Ədliyyə Nazirliyi,  Rabitə və Yüksək Texnologiyalar Nazirliyi və digər qurumlara tapşırılıb.  Hazırda bu layihənin hazırlanması üzərində iş gedir”.

Komitədən verilən məlumata görə, qanun layihəsində 18 yaşa qədər uşaqların yaş qruplarına uyğun olaraq informasiya məhsullarının təsnifatı aparılacaq:

“ Belə ki, qanunda 6 yaşa qədər uşaqlar hansı informasiyaları əldə bilər  və ya yaxud 6-12, 18 yaşa qədər uşaqların yaş qruplarına uyğun olaraq informasiya məhsullarının təsnifatı  kimi məsələlər öz əksini tapacaq. Eyni zamanda, nəşr olunan və yaxud da ki, telekommunikasiya vasitəsi  ilə yayımlanan, ümumiyyətlə,  uşaqlarla bağlı  dövriyyədə olan bütün  informasiya vasitələri ilə bağlı qadağalar, məhdudiyyətlər olacaq”.

Qeyd edilib ki, indi belə normativlər yalnız  televiziyada  mövcuddur, amma indi bu, daha geniş sahəni əhatə edir:

“Yeni qanunda bu normativlər Azərbaycanda dövriyyə olunan bütün informasiya məhsullarına,  hər bir sahəyə aid ediləcək. Bilirsiniz ki, indi bu məsələ  aktualdır. Hazırda xüsusilə telekommunikasiya vasitələri  (internet, mobil internet və digər bu kimi  vasitələr) ilə yayımlanan bəzi informasiyalar var ki, uşaqların psixologiyasına, onların sağlam inkişafına mənfi göstərir. Bu sahəni tənzimləyən bir qayda, mexanizm olmalıdır. Üzərində iş  gedən layihə-qanun da bu məsələni əhatə edəcək”.

Komitədən onu da bildiriblər ki, layihədə xüsusi qanunlar olmaqla yanaşı, bu qanunları tənzimləyəcək qaydalar, mexanizm də yer alacaq.

"Bu qaydaların həyata keçirilməsi mexanizmi də həmin qanunun layihəsində müəyyənləşdiriləcək. Artıq bir neçə ölkədə belə qanunlar var. Biz də həmin ölkələrin təcrübəsindən istifadə edirik”.

Məlumata görə, qanun layihəsi  üzərində işlər davam edir. Qaydaların hazırlanması bu ilin sonunda yekunlaşacaq və 2017-ci ildə qəbul edilməsi üçün Milli Məclisə təqdim ediləcək.

 

Məltəm Talıbzadə

 

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.