MOBİL RABİTƏ

Bakcell şirkəti Bakı şəhərinin və Abşeron yarımadasının 200-dən artıq nöqtəsində öz abunəçilərinə pulsuz Wi-Fi şəbəkəsi təqdim edir.

Şirkətdən Xeberler.az-a bildirilib ki, istifadəyə verildiyi vaxtdan indiyə kimi Bakcell-in təqdim etdiyi Wi-Fi internet xidmətindən 50 000-dən artıq Bakcell abunəçisi və eləcə də Bakcell şəbəkəsini seçərək rouminq xidmətindən istifadə edən xarici qonaqlar yararlanıb.

2014-cü ildən başlayaraq Bakcell bütün abunəçiləri və Rominqdə olan xarici qonaqlar üçün Bakı şəhərinin və Abşeron yarımadasının bir çox yerlərində Wi-Fi şəbəkəsini genişləndirməkdədir. Hazırda abunəçilər Milli Park, Heydər Əliyev adına Beynəlxalq Hava Limanı, Tibb Universiteti, Qubernator bağı, Elmlər Akademiyası parkı, Fəvvarələr meydanı, Sahil Parkı, Hüseyn Cavid parkı, Rixard Zorge parkı, Malakan bağı, Qış bağı və bir çox digər mədəni-tarixi və istirahət yerlərində quraşdırılmış nöqtələrdə Bakcell şirkətinin pulsuz Wi-Fi şəbəkəsindən istifadə edirlər. Pulsuz Wi-Fi xidməti keçən ilin yayından 189 taksi sifarişi xidmətinin nəqliyyat vasitələrində, 10 avtobus dayanacağında və 77 saylı Bakı avtobus marşrut xəttində də mövcuddur.

“Məqsədimiz odur ki, Bakcell-in mobil internet xidmətindən hər yerdə istifadə etmək mümkün olsun. Wi-Fi xidmətinin göstərilməsinə biz təxminən 2 il əvvəl başlamışıq, hazırda Bakcell Azərbaycanda ən geniş Wi-Fi şəbəkəsini təmin edir. Bu gün mobil internet artıq sabit internet əlaqəsini üstələyir və bu tendensiya davam etməkdədir. Bakcell ən son texnologiyalardan istifadə edərək Bakıda və Abşeron yarımadasında bu günə ən yaxşı, ən sürətli və ən geniş Wi-Fi şəbəkəsi qura bilib”,-deyə Bakcell şirkətinin baş icraçı direktoru cənab Riçard Şirer bildirib.

Xeberler.az