EDUTECH

Yeni tədris ilində Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən ümumi təhsil müəssisələrində ümumilikdə 505 mindən artıq şagirdin təhsil alacağı gözlənilir. Bu təhsil müəssisələrində 28 mindən artıq müəllim, məktəbəqədər təhsil müəssisələrində isə 4 mindən artıq tərbiyəçi-müəllim çalışır.

Xeberler.az məlumat verir ki, bunu Bilik Günü ilə bağlı keçirilən tədbirdə jurnalistlərə müsahibəsində BŞTİ-nin müdiri Nərminə Hüseynova deyib. O, yeni tədris ilinə hazırlıq işləri barədə məlumat verib: “BŞTİ-nin tabeliyində 673 təhsil müəssisəsi, 9 məktəbdənkənar müəssisə fəaliyyət göstərir. On təhsil müəssisəsində əsaslı təmir işləri aparılıb. Bir məktəbdə əlavə tədris korpusu tikilib və əsas korpusu təmir edilib. Burada dörd ümumi təhsil müəssisəsi sökülərək yenidən inşa olunacaq, 2 təhsil müəssisəsində və 2 məktəbəqədər təhsil müəssisəsində əsaslı təmir işləri aparılacaq. Hazırda 100-dək digər müəssisələrdə isə cari təmir və mühəndis kommunikasiya işləri aparılır. Bu işlərin görülməsində məqsəd təhsil mühitinin daha da yaxşılaşdırılması və məktəblərin infrastrukturunun daha da təkmilləşdirilməsidir”.

N.Hüseynova yeni tədris ili ilə bağlı həyata keçirilən yeniliklərdən də danışıb: “Bütün Bakı məktəblərində “Rəqəmsal məktəb” platforması tətbiq olunacaq. Platformanın əsas məqsədi məktəb, müəllim, şagird və valideyn arasında məlumat mübadiləsinin rəqəmsallaşdırılması və müəllim fəaliyyətinin daha da səmərəli aparılmasıdır. Hazırda kağız jurnallar ləğv olunub və bu gündən etibarən jurnallar “Rəqəmsal məktəb “ platformasında rəqəmsal formatda istifadə olunacaq. Valideynlər öz övladlarının qiymətlərini, məktəbə davamiyyətini dərhal elektron formada əldə edəcək. Onların sualları yarananda müəllimlə elektron xidmət vasitəsilə əlaqə saxlayacaqlar. Rəqəmsallaşma bu il bütün məktəblərdə tətbiq olunur”.

BŞTİ-nin müdiri tam orta məktəb layihəsi barədə də məlumat verib: “Bu tədris ilindən iki məktəbdə - 96 nömrəli tam orta məktəbdə və 239 nömrəli tam orta məktəbdə tam orta təhsil layihəsi tətbiq olunur. Layihənin əsas məqsədi 10-cu və 11-ci sinif şagirdlərinin maraq və meyillərini nəzərə alaraq onların fərdi inkişaf imkanlarının genişləndirilməsi və tədrisin keyfiyyətinin daha da təkmilləşdirilməsidir. Layihənin pedaqoji heyəti əsas akademik göstəriciləri yüksək olan müəllimlərdən ibarətdir. Ümid edirik ki, ilin sonunda bu layihənin müsbət nəticələri olacaq”.