RƏQƏMSAL DÜNYA

Qəbələ Dəmir Yolu Vağzalının və Ləki-Qəbələ birtərəfli dəmir yolu xəttinin açılışından 1 ildən çox vaxt keçib.

Bununla belə, hələ ki, bu dəmir yolu ilə sərnişin daşımaları həyata keçirilmir.

Xeberler.az report.az-a istinadən bildirir ki, hazırda turizm mövsümüdür və Qəbələ Azərbaycanın turizm destinasiyaları arasında ilk üçlükdə qərarlaşıb. Bəs görəsən yeni xəttin açılması nə zaman baş verəcək və gecikmələr turizm axınına necə təsir edəcək?

Turizm eksperti Samir Dübəndi hesab edir ki, qatarların ölkə daxilində fəaliyyəti, dəmir yol şəbəkəsinin inkişafı turizm üçün çox önəmli amildir: “Qatarla daha rahat və daha uzun məsafəyə səfər etmək mümkündür. Gəncə istiqamətində sürətli adlandırılan dəmir yolu xəttimiz var, düzdür bu qatar bir o qədər də sürətli deyil. Lakin turizmə töhfə verir. Hesab edirəm ki, ölkənin dəmir yol şəbəkəsini genişləndirmək və təkmilləşdirmək lazımdır. Bəzi yerlərdə dəmir reyslərinin dəyişdirilməsi, bəzi istiqamətlərdə isə yeni yolların salınmasına ehtiyac var. Düşünürəm ki, dəmir yolları yaxşı işləsə ölkədə turistlər üçün xeyli imkanlar yarana bilər. Biz turistlərin rahatlığını bununla təmin edə bilərik. Bununla yanaşı, avtomobil yollarında olan sıxlığı da aradan qaldıra bilərik”.

S. Dübəndi qeyd edib ki, Qəbələ son illər ölkədə inkişaf etmiş turizm destinasiyasına çevrilib: “Qəbələdə Beynəlxalq Hava Limanı da fəaliyyət göstərir. Bu hava limanının daha geniş və daha fərqli istiqamətlərdə aviareyslərin həyata keçirilməsi arzu ediləndir”.

Turizm eksperti Rəhman Hacıyev isə hesab edir ki, Qəbələyə qatarın işləməsi aşağı büdcəli turistlərin əlçatanlığına şərait yaradar: “Bu isə bölgəyə turist axınının genişlənməsinə səbəb olar. Bu gün Qəbələyə müxtəlif turizm marşrutları təşkil edilir. Lakin ölkədə və xarici turistlər arasında qatarla səyahət etməyə marağı olanlar çoxdur. Qatarların faəliyyəti Qəbələyə daha təhlükəsiz şəraitdə çatmağa imkan verər. Biz əvvəlki tarixə nəzər salsaq görərik ki, sovet dövründə turistlər qatarla hərəkət edirdilər. Bütün ölkə daxilində sanatoriyalara gedənlər əsasən qatarla hərəkət edirdilər”.

O vurğulayıb ki, bu gün Qəbələ həm yerli, həm də xarici turistlər üçün önəmli əsas məkandır: “Hazırda digər ölkələr üçün aviabiletlər pandemiyadan əvvəlki illə müqayisədə 2 dəfə bahalaşıb. Bu isə yerli turistlərin ölkədə qalmasına səbəb olub. Həmçinin, quru sərhədlər də bağlanıb. Hər il ölkədə çoxlu sayda insanlar Rusiyanın müalicəvi istirahət mərkəzlərinə üz tuturdular. Artıq onlar da ölkə daxilində istirahət etməyə önəm verirlər. Onu qeyd edə bilərəm ki, Qəbələ istiqamətində hotellərdə istirahət günləri, bayram günləri yer tapmaq çox çətindir. Bu baxımdan, Bakı-Qəbələ qatarın açılması zəruridir. Alternativ nəqliyyat vasitələrinin fəaliyyəti turizmin inkişafını şərtləndirən amillərdəndir”.

Bəs “Azərbaycan Dəmir Yolları” QSC bu barədə nə deyir?