BAKUTEL-2011-də ilk dəfə regional televiziyalar da iştirak ediblər
25-11-2011
21:41
Hər il təşkil olunan BAKUTEL-2011 sərgisində ilk dəfə olaraq Azərbaycanın bölgə telekanalları RTV, Kanal S, Kəpəz TV, EL TV, Cənub TV, Türkel TV də iştirak edib
Telekanalların fəaliyyətini əks etdirən stendlərdə yüz əllidən çox televiziya layihəsi, tanıtım çarxları, yayım zonaları barədə informasiya, auditoriya, kadr və texniki imkanlar, habelə reklam təklifləri barədə məlumatlar təqdim edilib. Sərgidə həmin telekanalların yaratdığı “Region TV” televiziya istehsalat birliyinin təqdimatı olub.
Region TV-nin BAKUTEL-2011 sərgisindəki nümayəndəsi bildirib ki, birliyin yaradılmasında əsas məqsəd regional telekanalların efir, kadr və texniki imkanlarından müştərək şəkildə istifadə etməkdir. Bu da öz növbəsində, hər bir bölgə telekanalına daha geniş yayım imkanları verməklə, televiziya məhsulunun keyfiyyətini artırmağa, həmçinin telekanalların ayrı-ayrılıqda resurslardan daha rasional şəkildə istifadə etmələrinə imkan verir.
Sərgidə təmsil olunan telekanallar, Azərbaycanın böyük hissəsinə yayımlanmaqla yanaşı, internet vasitəsilə də tamaşaçıların qonağı olur.
