SÜNİ İNTELLEKT VƏ DATA

Berlində Avropa Rəqəmsal Sammiti keçirilib.

Xeberler.az Azərtaca istinadən məlumat verir ki, Sammitdə Almaniya Kansleri Fridrix Merts və Fransa Prezidenti Emmanuel Makron iştirak ediblər.

F.Merts və E.Makron çıxışlarında Avropanın rəqəmsal suverenliyinin strateji əhəmiyyətini vurğulayıblar.

Almaniya Kansleri bildirib ki, rəqəmsal suverenlik Avropa, eləcə də onun ümumi dəyərləri, iqtisadi rəqabətqabiliyyəti, təhlükəsizliyi və müdafiəsi üçün mərkəzi rol oynayır. Almaniya və Fransa birlikdə Avropa İttifaqının rəqəmsal suverenliyini gücləndirmək və dövlət idarələrində Avropa istehsalı olan rəqəmsal həlləri tətbiq etmək üçün liderlik edəcək.

Hər iki lider Avropanın innovativ süni intellekt texnologiyalarında liderliyinin vacibliyini bildirib.

Sammit çərçivəsində Almaniya, Fransa və Avropanın digər ölkələrini təmsil edən şirkətlər 12 milyard avrodan çox investisiya və innovasiya tərəfdaşlığı barədə razılığa gəlib. Süni intellekt sahəsində ümumilikdə 18 yeni tərəfdaşlıq yaradılıb ki, bunların arasında müdafiə texnologiyaları və bioloji superintellekt layihələri də var.

Avropanın aparıcı şirkətləri SAP və “Mistral AI” geniş əməkdaşlıq edərək süni intellekt modellərinin inkişafına dəstək verəcək. “Mistral AI”, həmçinin münxneli startap “Helsing” ilə birlikdə döyüş sahəsində məlumatların emalı üzrə texnologiyaları inkişaf etdirəcək. Berlindəki “Charite” tibb müəssisəsi isə “Gustave Roussy” və “Owkin” ilə əməkdaşlıq edərək ilk panavropa bioloji superintellekt infrastrukturunu qurmağı hədəfləyir.

Berlin Rəqəmsal Sammitində, həmçinin Avropada kvant texnologiyaları, superkompüterlər və növbəti nəsil süni intellekt modellərinin inkişaf etdirilməsi, məlumatların qorunması və Avropa texnologiyalarının üstünlük təşkil etməsi məsələləri müzakirə olunub. Hər iki lider Avropa rəqəmsal suverenliyini gücləndirmək, innovasiyaları təşviq etmək və onu iqtisadi uğura çevirmək üçün birgə səylərin davam etdiriləcəyini vurğulayıblar.