SÜNİ İNTELLEKT VƏ DATA

Avropa Komissiyası (AK) Avropa İttifaqında süni intellektə (AI) 200 milyard avro investisiya səfərbər etmək üçün təşəbbüs başladır.

Xeberler.az TASS-a istinadən məlumat verir ki, bunu Avropa Komissiyasının (AK) sədri Ursula fon der Lyayen Parisdə süni intellekt sammitində çıxışı zamanı bildirib.

"Mən burada "Süni İntellektə İnvestisiya" (InvestAI) təşəbbüsünü elan etməkdən məmnunam. Biz Avropada süni intellektə 200 milyard avro investisiya səfərbər etməyə çalışırıq. Biz sənaye və kritik əhəmiyyətli tətbiqlərə diqqət yetirəcəyik. Bu, etibarlı AI inkişafı üçün dünyanın ən böyük dövlət-özəl tərəfdaşlığı olacaq", - o bildirib.

Onun sözlərinə görə, bu vəsait Aİ-də süni intellekt üzrə gigafabriklərin yaradılmasına yönəldiləcək.

"Bu böyük süni intellekt infrastrukturu ən mürəkkəb AI modellərinin açıq birgə inkişafını təmin etmək və Avropanı AI qitəsinə çevirmək üçün lazımdır. Tədqiqatçılar, sahibkarlar və investorlar güclərini birləşdirə biləcəklər. Sənaye sahələri əməkdaşlıq edə və məlumatlarını birləşdirə biləcəklər. Biz onlar üçün təhlükəsiz məkan yaradırıq", - o əlavə edib.

AK-nın bəyanatında qeyd olunur ki, InvestAI Aİ-nin hər yerində dörd gələcək süni intellekt gigafabrikini maliyyələşdirəcək. "Yeni süni intellekt gigafabrikləri ən mürəkkəb, çox böyük AI modellərinin təlimi üzrə ixtisaslaşacaq. Bu cür növbəti nəsil modellər tibb və ya elm kimi müəyyən sahələrdə irəliləyişlər üçün geniş hesablama infrastrukturu tələb edir. Gigafabriklər təxminən 100 min ən son nəsil süni intellekt çipinə malik olacaq ki, bu da hazırda yaradılan süni intellekt fabriklərindən təxminən dörd dəfə çoxdur", - sənəddə qeyd olunub.