SÜNİ İNTELLEKT VƏ DATA

Almaniya onilliyin sonuna qədər iqtisadiyyatını dəstəkləmək və aparıcı texnologiyalar sahəsində qlobal miqyasda rəqabət apara bilmək üçün süni intellektdən istifadəni genişləndirməyi planlaşdırır.

Xeberler.az məlumat verir ki, Almaniyanın Elmi Tədqiqatlar Nazirliyinin strategiya layihəsində deyilir: “Süni intellektin inkişafı sayəsində biz 2030-cu ilə qədər iqtisadi istehsalımızın 10 faizini süni intellekt əsasında həyata keçirmək və onu əsas tədqiqat sahələrində mühüm alətə çevirmək istəyirik”.

“Reuters” yazır ki, süni intellekti inkişaf etdirmək uğrunda yarış daha da qızışır: Çin, ABŞ və Hindistan lider mövqeyə yüksəlib ki, bu da Almaniyaya və ümumilikdə Avropa İttifaqına (Aİ) təzyiq göstərir və onları liderlər səviyyəsinə qalxmağa vadar edir.

Strategiyada hazırda Almaniya iqtisadiyyatının hansı hissəsinin süni intellekt tərəfindən dəstəkləndiyi barədə dəqiq məlumat yoxdur.

İqtisadçılar Almaniya sənayesinin rəqabət qabiliyyətini qorumaq üçün təcili tədbirlər görülməsini tələb edirlər. Bu ilin əvvəlində IW institutu bildirib ki, 2025–2030-cu illərdə Almaniyada əmək məhsuldarlığı hər il orta hesabla 0,9 faiz artacaq və 2030-cu illərdə bu göstərici 1,2 faizə çata bilər. Hazırkı onillikdə bu artım cəmi 0,4 faizdir.

Gözlənilir ki, Almaniya Nazirlər Kabineti ayın sonunadək bu strategiyanı təsdiqləyəcək, qarşısına ABŞ və Çini süni intellekt sahəsində yaxalamaq kimi iddialı bir məqsəd qoyacaq.

Avropa Komissiyası “süni intellekt giqafabriklərinin” tikintisi üçün Aİ-yə 20 milyard avro ayırıb. Alman hökuməti isə bu mərkəzlərdən azı birini “Deutsche Telekom” şirkəti ilə birlikdə Almaniyada inşa etməyi planlaşdırır.

Strategiyada, həmçinin kvant hesablamaları texnologiyalarının inkişafı da hədəf kimi göstərilib. Sənədə görə, 2030-cu ilə qədər istifadəçilər üçün əlçatan olacaq iki “səhv korreksiyalı (və ya səhvləri korreksiya edən) kvant kompüteri” yaradılmalıdır.

Strategiyada qeyd olunur ki, Almaniyanın innovasiya sahəsində ilkin uğurlarına baxmayaraq, süni intellekt texnologiyalarının kommersiyalaşdırılmasında hələ də geridə qalır.