SÜNİ İNTELLEKT VƏ DATA

OpenAI şirkəti ChatGPT platformasında onlayn məhsulların alınması üçün ödəniş sistemi yaratmaq üzərində iş aparır.

Xeberler.az bildirir ki, bu sistem vasitəsilə istifadəçilər chatbot içərisindən birbaşa alış-veriş edə biləcək, satıcılar isə satışlardan müəyyən faizdə komissiya ödəyəcəklər.

Hazırda ChatGPT istifadəçiləri məhsul təkliflərini görür və onları digər onlayn mağazaların saytlarına yönləndirir. Yeni ödəniş sistemi ilə isə istifadəçilər saytı tərk etmədən, elə chatbot üzərindən istədikləri məhsulu seçib almaq imkanı əldə edəcəklər. Bu, alış-veriş prosesini daha rahat, sürətli və əlçatan edəcək.

OpenAI və e-ticarət sahəsinin öncül platformalarından biri olan Shopify artıq bu ödəniş sisteminin ilkin variantlarını bəzi brendlərə təqdim edib və maliyyə şərtləri ilə bağlı danışıqlar aparır. İki şirkət bu ilin əvvəlində əməkdaşlığa başlayıblar. Bu əməkdaşlıq çərçivəsində ChatGPT-də məhsul və istifadəçi rəylərinin daha yaxşı göstərilməsi təmin olunmuşdu.

OpenAI bu ilin əvvəlində açıqlayıb ki, 2025-ci ilin iyun ayına kimi illik gəlir sürəti 10 milyard dollar səviyyəsinə çatıb. Bu rəqəm 2024-cü ilin sonundakı 5,5 milyard dollardan xeyli yüksəkdir. Lakin şirkət 2024-cü ildə təxminən 5 milyard dollar zərər də çəkib.

Bu yeni ödəniş sistemi OpenAI üçün əlavə gəlir mənbəyi yaradacaq və ChatGPT-ni təkcə sual-cavab və mətn əsaslı xidmət deyil, həm də tam funksional onlayn alış-veriş platformasına çevirəcək. İstifadəçilər yaxın vaxtlarda ChatGPT vasitəsilə rahat şəkildə məhsul alıb-sata biləcəklər, satıcılar isə bu yeni kanal vasitəsilə daha çox müştəriyə çatmaq imkanı əldə edəcəklər.