"Rəsmi Bakının razılığı olmadan Dağlıq Qarabağa olan səfərlərin qarşısı zərbə dronları ilə alına bilər".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib:
"Prezident İlham Əliyevin 2020-ci ilin yekunlarına həsr olunmuş müşavirədəki çıxışından belə anlamaq olar ki, dövlət başçısı da Dağlıq Qarabağdakı rusiyalı hərbçilərin fəaliyyətindən narazıdır.
O, Fransadan olan parlament heyətinə Dağlıq Qarabağa getmək üçün Rusiya sülhməramlılarının Azərbaycanın razılığı olmadan icazə verilməsindən kəskin narazılığını bildirib".
"Biz bu sülhməramlı qüvvələr qarşısında məsələ qoymuşduq ki, bizim icazəmiz olmadan heç bir xarici vətəndaş Dağlıq Qarabağa gedə bilməz” – Prezident belə deyib.
"Prezident eyni zamanda Ermənistan rəsmilərinin də Dağlıq Qarabağa səfərlərinə kəskin etirazını bildirib. Bunun qəbuledilməz olduğunu qeyd edib. Prezident erməni tərəfə baş verənlərdən nəticə çıxarmağı tövsiyyə edib.
Nəticə çıxarmasalar, onların böyük problemləri olacağını və yenə də peşman olacaqlarını vurğulayıb.
Prezidentin çıxışından, təpkisindən belə qənaətə gəlmək olar ki, növbəti dəfə Azərbaycanın razılığı olmadan Ermənistandan və ya xaricdən hansısa səfərlər, olacaqsa müşahidə və zərbə dronları işə düşə bilər".
Prezident səviyyəsində edilən xəbərdarlıqdan sonra bu, çox doğru, ədalətli və məntiqi bir addım olardı - deyə Osman Gündüz sonda qeyd edib.
