Qarabağda internet və rabitə necə qurulacaq? - TƏKLİF

26-11-2020 / 18:00

Dağlıq Qarabağda internet və rabitə sistemi yenidən qurulacaq. Lakin Xankəndində, Xocalı və Xocavənddə də telekommunikasiya, internet və TV infrastrukturunun necə qurulacağı və kimin nəzarətində olacağı məsələsi sual doğurur.

Xeberler.az bildirir ki, Azərbaycan İnternet Forumunun prezidenti Osman Gündüz məsələyə münasibət bildirib.

O deyib ki, əvvəllər qeyri-qanuni fəaliyyət göstərən “Karabakh Telecom” mövcud olub:

“Livanlıların olsa da sonradan müharibə zamanı onu Arayik Arutunyan ələ keçirmişdi. Sülhməramlılar qeyri-qanuni “Karabakh Telecom”-dan istifadə edəcəklərmi? O yenidən fəaliyyətə başlayacaqmı ? Bildiyim qədər o zamanlar Xankəndinə Ermənistandan fiber-optik xətt də çəkilməliydi. Hazırda bu kommunikasiya kimin nəzarətindədir? Separatçılara Ermənistanla kommunikasiya yaratmaq, belə bir imkanı onlara vermək düşünürəm ki, heç bir halda doğru olmazdı. Fikrimcə, bu məsələlər ciddi monitorinq olunmalıdır. Mövcud kommunikasiya infrastrukturunun monitorinqi aparılmalı, Ermənistanla bütün yerüstü və yeraltı kommunikasiya xətləri, radiorele xətləri, retranslayasiya qurğuları, rouminq məsələləri nəzarətə götürülməlidir”.

Hazırda Xankəndinə kommunikasiya və internetin necə verilməsi məsələsinə gəlincə, ekspert bildirib ki, istənilən halda bu telekommunikasiya infrastrukturu Azərbaycan üzərindən qurulmalıdır:

“Əks halda yenə də hansısa provayder və ya operator fəaliyyətə başlasa, yenə də qanunsuz hesab olunmalıdır. Düşünürəm ki, sülhməramlılar, Türklərin də iştirakı ilə bir telekommunikasiya operatoru formalaşdıra bilərlər, bu qurum Azərbaycan tərəfdən İnternet, rabitə, TV və telekommunikasiya xidmətləri üçün müvafiq qeydiyyatdan keçməli, zəruri icazələr, lisenziyalar alınmalı və məhz bundan sonra Dağlıq Qarabağa telekommunikasiya xidmətləri verilməlidir. Yəni, sülhməramlıların yaratdığı provayder və ya operator bütün interneti, kommunikasiyanı Azərbaycan tərəfdən almalıdır. Fikrimcə, Ermənistan üzərindən Xankəndinə hansısa retranslyasiya ilə, yeraltı və ya yerüstü infrastrukturla rabitə, internet, efir və digər kommunikasiyalara yol vermək olmaz”.


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə