E - HÖKUMƏT

Daşınmaz əmlakın kadastrı və elektron kadastr məlumat bazasının yaradılması istiqamətində işlər aparılır.

Xeberler.az bildirir ki, respublikanın 3,5 mln. ha ərazisində İnzibati ərazi vahidlərinin sərhədlərinin müəyyənləşdirilməsi, bələdiyyə xəritələrinin hazırlanması işləri icra edilir. Belə ki, bu proses 1,8 mln. ha ərazidə artıq yekunlaşıb.

Bütün ölkəni əhatə edən rəqəmli ortofotoxəritələr hazırlanıb təqdim edilib. Yeni ortofotoxəritələrin yaradılmasının əsas məqsədi torpaq sahələrinin və digər daşınmaz əmlak obyektlərinin qeydiyyatı və kadastrı məqsədləri üçün müxtəlif miqyaslarda yeni ortofotoxəritələrin hazırlanmasından ibarətdir. Aero çəkiliş əsasında hazırlanmış ortofotoplanlar şəhər ərazilərində və rayon mərkəzlərində 1:2000 miqyasında, kənd və bələdiyyə əraziləri 1:5000 miqyasında əhatə edir. Peyk təsvirləri əsasında hazırlanmış 1:10000 miqyaslı ortofotoxəritələr dağlıq əraziləri, respublika sərhəddi boyunca yerləşən əraziləri və yaylaq-qışlaq, qoruq əraziləri əhatə edir.

Bu günə kimi 1:8000 uçuş miqyaslı aeroşəkillər əsasında hazırlanmış 5100,99 kv.km ərazinin 1:2000 miqyaslı ortofotoxəritələri hazırlanaraq təqdim edilib. 1:20000 uçuş miqyaslı aeroşəkillər əsasında hazırlanmış 43000 kv.km ərazinin 1:5000 miqyaslı ortofotoxəritələri hazırlanaraq təqdim edilib.

Əmlak idarəçiliyi sahəsində mühüm infrastruktur olan ölkənin bütün ərazisində (işğal olunmuş ərazilər istisna olmaqla) 37 Daimi Fəaliyyət Göstərən Geodeziya İstinad Stansiyaları (AZPOS) quraşdırılıb. 

Ruhəngiz Muradova