RƏQƏMSAL DÜNYA

Ədliyyə Nazirliyi tərəfindən "ƏN TEZ xidmət" konsepsiyası hazırlanıb.

Xeberler.az bildirir ki, bu barədə Ədliyyə Nazirliyinin İnformasiya-kommunikasiya texnologiyaları idarəsinin rəisi Ağakərim Səmədzadə deyib.

O bildirib ki, "ƏN TEZ xidmət" artıq istifadəyə verilib: "Vahid məkanda cəmləşən və rəqəmsallaşan xidmətlərin smart texnologiyaları əsasında daha sürətləndirilmiş şəkildə əhaliyə təqdim edilməsi, həmçinin sosial-iqtisadi inkişafın Milli Prioritetlərindən biri olan Böyük Qayıdışa uyğun işğaldan azad edilmiş torpaqlarımızda aparılan genişmiqyaslı bərpa-quruculuq tədbirləri çərçivəsində bu ərazilərdə xidmətlərdən daha operativ yararlanması qarşıya qoyulan hədəflər sırasındadır. Məhz bu hədəflərə nail olunması məqsədi ilə Ədliyyə Nazirliyi tərəfindən “ƏN TEZ” konsepsiyası hazırlanıb. Bu konsepsiya təkcə müxtəlif ədliyyə orqanlarına müraciət etmək imkanı deyil, həmçinin hazır sənədlərin yerindəcə verilməsi prinsipinə əsaslanır və xidmətlərin olduqca sürətləndirimiş rejimdə göstərilməsini şərtləndirir".

İdarə rəisi qeyd edib ki, həmin sürətə nail olmaq üçün respublikada fəaliyyət göstərən bütün yerli ədliyyə orqanları həmin xidmət şəbəkəsinə cəlb olunacaq və vətəndaşın müraciəti zamanı həmin vaxt işi nisbətən az olan qurum onun icrasını təmin edəcək: "”ƏN TEZ”-in açıqlamasını versək, Ədliyyə Nazirliyinə təcili elektron zəng, xidmətinin özəlliyi müraciət edən şəxsdən hər hansı sənəd, yaxud elektron imza tələb etmədən sadəcə, operatora bir video zəng etməklə xidmətlərdən məsafədən yararlanmasındadır. Yeni infrastrukturların yaradılmasını, habelə əlavə işçi qüvvəsinin cəlb edilməsini istisna edən bu konsepsiya izafi xərclərin qarşısını almaqla yanaşı müxtəlif ədliyyə xidmətlərindən eyni zamanda yararlanmasını təmin edəcək".