"Son zamanlar DİN bir çox yeni xidmətlər və yeniləşmiş xidmətlər təqdim edir. Bir müddət öncə DİN texpasportun-sürücülük vəsiqəsinin formasını dəyişdiyini açıqlayıb, bir neçə gün öncə də yeni "77" seriyası ilə başlayan avtomobil nömrələrinin verilməsinə başlandığını bildirib".
Xeberler.az bildirir ki, bu sözləri Azərbaycan İnternet Formunun Prezidenti Osman Gündüz deyib.
Ekspertin sözlərinə görə, bunların hamısını ilk baxışdan faydalı və uğurlu addımlar kimi dəyərləndirmək olar.
"Amma qəribədir ki, bu addımların heç biri müasir çağırışlarla ayaqlaşmır. DİN bu xidmətlərin rəqəmsal versiyasına diqqət yetirmir. DİN hələ də klassik ənənələrə üstünlük verir.
Elektron Hökumətə cavabdeh eGov Mərkəzi isə sanki xidmətlərin rəqəmsallaşmasını unudub. İndiyədək də, dəfələrlə təkrarlanmasına baxmayaraq, DİN avtomobillərin dövlət qeydiyyatına alınması, dövlət nömrə nişanlarının verilməsi xidmətini rəqəmsallaşdırmayıb.
Hələ də cəlbedici nömrələr üzrə şəffaf bir sistem formalaşmayıb Hansı ki, bu xidmətləri rəqəmsal etmək üçün DİN-nin əlində yetərincə texniki texnoloji və kadr resursları var.DİN öz texnoloji imkanları ilə hətta digər qurumlara rəqəmsallaşmaq üçün resurslar təqdim edir.
Belə olan halda DİN-nin və eGov-a cavabdeh qurum olan VXSİ Dövlət Agentliyi yanında Elektron Hökumətin İnkişafı Mərkəzinin bu xidmətlərin rəqəmsallaşmasına və əlçatanlığın artırılmasına diqqət yetirməməsi anlaşılan deyil".
Osman Gündüz bildirib ki, DİN eGov Mərkəzinin yaratdığı Asan Login sisteminə də qoşulmayıb. MyGov-da DİN yoxdur.
"eGov Portalında DİN-nin cəmi 3 xidməti görsənir. DİN iddia edir onun ayrıca, separat formada e-Xidmət mərkəzi var.
Hansı ki, bir neçə aydır qeydiyyatdan keçməyimə baxmayaraq bu separat sistemə daxil ola bilmirəm. Ümid edirəm bu sistemin arxasında duran İT komanda log fayllara baxıb səbəbini araşdıracaqlar.
Düşünürəm ki, DİN və eGov Mərkəzi ayrılıqda fəaliyyətə son qoymalı, mahiyyətcə kütləvi olan, ictimai əhəmiyyət kəsb edən xidmətləri elektronlaşmalı və maşın nömrələri üçün auksion satış sistemi təşkil olunmalıdır, datalar inteqrasiya olunmalıdır".
