"Bir zamanlar DİN hər gün bank kartları ilə bağlı kibercinayətlərin statistikasını paylaşırdı. Bu açıqlamalar cəmiyyətin diqqətini çəkir, insanları maarifləndirir, hər kəsi daha ehtiyatlı olmağa vadar edirdi".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, DİN bu məlumatları həm özündə toplanan datalardan, həm də banklarla DİN-in Kibercinayətkarlıqla Mübarizə Baş İdarəsi arasında real vaxtda çalışan sistemdən əldə olunan datadan istifadə etməklə paylaşırdı:
"Yəni qurum mövcud datadan həm də maarifçilik, hesabatlılıq və şəffaflıq üçün çox effektiv şəkildə istifadə edirdi. Media da bu məlumatları ictimailəşdirməklə profilaktika işlərində mühüm rol oynayırdı.
Amma birdən-birə DİN, bu sahədə maariflənmədə mühüm rol oynayan, qurumun mətbuat xidmətinin rəhbəri Elşad Hacıyev bu açıqlamaları dayandırdı. Belə ictimai əhəmiyyət daşıyan məlumatların paylaşılmasının kəsilməsi olduqca düşündürücü və təəssüf doğurucudur".
Görəsən, nə üçün bu açıqlamalar dayandırılıb?
Osman Gündüz bildirib ki, iddialara görə, bu tip açıqlamaların bankların nüfuzuna kölgə saldığı bildirilirdi. Xatırlayıram ki, bir müddət öncə MB nümayəndələri də bank kartları ilə bağlı kibercinayətlərin statistikalarının gündəlik deyil, aylıq təqdim olunacağını bəyan etmişdilər:
"Lakin hələlik görünən odur ki, DİN-in gündəlik açıqlamaları dayanıb və Mərkəzi Bank ilə birgə vəd edilən aylıq statistika da ortada yoxdur.
Nəticədə cəmiyyət, media və vətəndaşlarımız baş verən kibercinayətlərdən xəbərsizdir, bu sahədə tendensiyanı izləyə bilmirlər, nədən ehtiyat etməli olduqlarını bilmirlər və s. Düşünürəm ki, ictimai əhəmiyyət kəsb edən belə məlumatların gizlədilməsi doğru yanaşma deyil.
Bu məsələyə sadəcə bankların imici prizmasından baxmaq düzgün olmaz. Bu, birbaşa vətəndaşların təhlükəsizlik məsələsidir. Problemin gizlədilməsi çıxış yolu deyil – əksinə, banklar öz təhlükəsizlik sistemlərini gücləndirməli, maarifləndirmə işlərinə daha çox resurs ayırmalıdır.
Ən çox şikayət olunan bankların reytinqini açıqlayan MB bu tip məlumatları da paylaşmaqdan çəkinməli deyil".
Ekspert qeyd edib ki, bu tip məlumatlar ictimai əhəmiyyət kəsb edir, cəmiyyət üçün, ictimai nəzarət üçün olduqca vacibdir:
"Ümid edirəm ki, DİN ən qısa zamanda bu boşluğu aradan qaldıracaq və ictimaiyyəti müntəzəm olaraq real vəziyyətdən xəbərdar edəcəklər".
