Bu gün General-polkovnik Vilayət Eyvazov Qazaxıstanın daxili işlər naziri polis general-leytenantı Erjan Sadenovla görüşüb.
Diqqətimi cəlb etdi ki, qonaqlara Təhlükəsiz Şəhər Xidməti və Nəqliyyatı İntellektual İdarəetmə Mərkəzi də təqdim edilib.
Xeberler.az bildirir ki, bu barədə Azərbaycan İnternet Forumunun prezidenti , Multimedia Mərkəzinin direktoru Osman Gündüz öz sosial media hesablarında yazıb.
"Azərbaycanda Təhlükəsiz Şəhər Xidməti nəhəng, effektiv bir video-müşahidə və informasiya sistemidir.
Onlarla alt sistemləri var. Biometrik identifikasiyalardan, rəqəmsal izləmələrdən istifadə olunur. Son illər xeyli təkmilləşdirilib, təhlükəsizlik kameraları ilə təminat gücləndirilib.
DİN bu sistemdən çox effektiv istifadə edir. Xatırlayıram ki, Bravo Supetmarketində baş verənlərin operativ olaraq aşkarlanmasında bu sistemin də müstəsna rolunun olduğu bildirilirdi.
Fikrimcə Təhlükəsiz Şəhər Xidməti qonaqlar üçün xeyli əhəmiyyət kəsb edə bilərdi.
NİİM-in isə son durumundan xəbərim yoxdur. Amma xatırlayıram ki, DİN onu bərbad gündə təhvil almışdı.
Hələlik də görünən odur ki, on illər öncə bu qurumun qarşısına qoyulan vəzifələrin əksərinin reallaşması görsənmir.
Maraqlı məqam odur ki, Qazaxıstan polisinin də rəqəmsallaşmasında xeyli uğurlu işləri var.
Məsələn, nəqliyyat vasitələrinin qeydiyyatı və yenidən qeydiyyatı, nömrə alınması, texniki baxışın müəyyən hissəsi, texpasportun dəyişdirilməsi və s. bu tip xidmətlər bu ölkədə çoxdan rəqəmsallaşıb.
Polisin özünə rəqəmsal nəzarət sistemi qurublar, Yol Polisi daha çox rəqəmsallaşıb və s.
Bizdə də DİN bir müddət öncə çox faydalı bir e-Polis mobil tətbiqini istifadəyə verib.
Bir çox xidmətlər, 102 Zəng xidməti xeyli rəqəmsallaşdırılıb. Olduqca faydalı bir rəqəmsal həlldir.
Hələlik isə bəzi faydalı xidmətlər bu resursa inteqrasiya olunmayıb.
Məsələn, il ərzində yüz minlərlə avtomobil alqı-satqısı və yenidən qeydiyyatı xidmətlərini e-Polisdə görmək çox əhəmiyyətli olardı.
Hansı ki , artıq identifikasiya üçün hər bir vətəndaşa SİMA rəqəmsal imza da əlçatandır.
Güman etmək olar ki, generalların görüşündə hər iki ölkənin polis sisteminin rəqəmsal transformasiyasındakı uğurlar və problemlər barədə də fikir mübadiləsi aparılıb.
Ümid edirəm növbəti mərhələdə yuxarıda qeyd olunan ictimai əhəmiyyət kəsb edən xidmətləri də e-Polis-dən ala biləcəyik ", -deyə Osman Gündüz qeyd edib.
