"Facebook" və "Twitter"ə virtual əsgərlər sızdırılacaq
20-03-2011
11:55
ABŞ Müdafiə Nazirliyi dünyanın ən populyar sosial şəbəkəsi "Facebook" ilə "Twitter" mikrobloqinq servisində virtual akkauntlar yaradaraq Vaşinqtonun maraq və mənafelərini müdafiə etmək, habelə təbliğatla məşğul olmaq niyyətindədir.
Pentaqonun Orta Asiya və Yaxın Şərqdəki əməliyyatlar üzrə Mərkəzi Komandanlığının (Centcom) sifarişi ilə Kaliforniya ştatındakı bir şirkətin həyata keçirəcəyi layihə "Onlayn insan idarəetmə servisi" adlanır. Bu servis vasitəsilə Pentaqonun bir əməkdaşı dünyanın müxtəlif yerlərindən "Facebook" və "Twitter" qatıldığı təəssüratı yaradan onlarla saxta akkauntu idarə edə biləcək.
Mütəxəssislərin dediklərinə görə, layihənin başlıca məqsədi Vaşinqtonun maraq və mənafelərini təmin etməklə yanaşı, Birləşmiş Ştatların siyasətini və diplomatiyasının təbliğatıdır.
Layihə çərçivəsində yaradılacaq saxta akkauntların tam əksəriyyəti ərəb, fars, urdu və puştu dillərində olacaq.
